Aneka Pasambahan Siriah

ANEKA

PASAMBAHAN SIRIAH

( Alua Rokok Jo Siriah )

Aneka Pasambahan Siriah ini merupakan kumpulan 15 tulisan dari berbagai sumber, sebagaimana kami cantumkan pada setiap bagiannya, sbb.:

Bagian I      : ALUR  SIRIAH  Dari : Maanta Marapulai (Balerong Grup)

Bagian II    :  PASAMBAHAN SIRIAH  Dari : ikkmduri.wordpress.com

Bagian III   :  SIRIAH PINANG ( MAMBUKA NIAT DARI SI ALEK)

                      Dari : home-pyk.blogspot.com

Bagian IV   :  ALUR ROKOK JO SIRIAH  Dari : larehnanpanjang.ucoz.com

Bagian V    :  Pasambahan Siriah  Dari : lachoga.blogspot.com

Bagian VI   :  Pasambahan Siriah  ferdymp.blogspot.com/

Bagian VII  :  Pidato Pasambahan  ( Pidato Siriah )

                        Dari : baguci.blogspot.com

Bagian VIII : PASAMBAHAN SIRIAH Dari : mukokantua.blogspot.com

Bagian IX    : Ba Sialua ( pasambahan siriah) Dari : www.pincuranbonjo.com

Bagian X     : PASAMBAHAN SIRIAH

Bagian XI    : PASAMBAHAN SIRIAH KAMPIE (ALEK JO PANGKA)

Bagian XII  : Pidato Pasambahan Adaik Pasambahan Siriah

Pidato Pasambahan Adaik

Bagian XIII  :  PASAMBAHAN SIRIAH Dari : nagarisitalang.wordpress.com

                        Posted by Nagari Sitalang Ditulis Kembali Oleh : I. St. Sinaro

Bagian XIV : Pidato Adaik Pasambahan Siriah

                       nagarisitujuahgadang.wordpress.com

Bagian XV  :  ALUR SIRIH Di edit dari :

                         HIMPUNAN TAMBO MINANGKABAU DAN BUKTI SEJARAH

                       Lima Kaum – 1978

Bagian XVI : PIDATO ADAT  PASAMBAHAN SIRIAH

                       Dari : www.rangtalu.net

Bagian I

ALUR  SIRIAH

Dari : Maanta Marapulai ( Balerong Grup )

1.       Rundiangan dari Pangka

Pangka

Sutan Parpatiah

Alek

Ambo

Pangka

Kapado sutan ambo mamohonkan sambah

Alek

Manitahlah

Pangka

Sungguahpun iyo bakeh sutan dipuhunkan sambah jo panitahan

Nak sarapeknyolah angku pangulu nan gadang basa batuah

Karapatan dunsanak jo sudaro

Sarato ipa dengan bisan ahli nan saisi rumah gadang nangko

Sakali ambo maantakan sambah

Indakkan diatok dibilang gala

Hanyo nan bagala paatok pambilang pamuliakan sambah

Sapihak sambah jo panitahan

Diparirikkan kahadapan pangulu nan gadang basa batuah

Ujuang panitahan kabakeh sutan parpatiah

Alek

Iyolah

Pangka

Adat kato nan kan disambahkan

Talatak putiang dihulu

Dibawah kumpalan tali

Asa mulo kato dahulu

Tigo limbago nan tajadi

Partamo sambah manyambah

Kaduo siriah jo pinang

Katigo baso jo basi

Sambah manyambah dalam adat

Tali batali undang-undang

Tasabuik di muluik manih

Tapakai jo baso baiak

Muluik manih calempong kato

Baso baiak gulo dibibia

Dalam cupak nan piawai

Banamo adat sopan santun

Adat dilawuik bajuru mudi

Adat di sabuang bajuaro

Tipak di alek barajo janang

Kok dikaji tantang si juru mudi

Tau di angin nan baseru

Tau di ombak nan basabuang

Tau di pasang turun naiak

Kok dikaji tantang si juaro

Tau di tuah sisiak ayam

Tau di bulang nan bakicuah

Pandai managak manampin taruah

Kok dikaji tantang si rajo janang

Tau di ereang dengan gendeang

Tau di caka dengan kaik

Pandai manjago labiah jo kurang

Baa sakarang iko kini sutan

Ramo-ramo tabang malayang

Malayok ka koto tangah

Banyaknyo ampek puluah ampek

Indah carano bukan kapalang

Talatak di tangah-tangah

Dilingkuang urang nan rapek

Buruang si nurak buruang nuri

Siculik ateh pamatang

Siriah galak pinang manari

Mancaliak alek nan lah datang

Lorong kapado caranonyo

Carano banja reno ali

Buatan tukang koto gadang

Nan rimbun bungo kalikih

Nan indah bungo kacubuang

Nan kungkun gagak ka inggok

Nan lantiak alang bamain

Sataun di pagang bugih

Samusim dilingka cino

Usahkan ratak rangeh pun tido

Pihak kapado songkok carano

Dalamak urang namokan

Kain tanun banamo sinang suto

Baukia ba bungo rampai

Baturab jo banang ameh

Balukih bak kaluak paku

Ragi nan samo baliak balah

Baratuih camin dipinggia

Batabua kaco di tangah

Kilek gumilek cahayonyo

Sarupo bintang ateh langik

Bintang gujarah bakuliliang

Pihak kapado nan siriahnyo

Siriah udang tampak ari

Tampuaknyo bak kuku balam

Gagang nan bagai aso-aso

Buah diambiak ka tinaman

Batang diambiak ka tiruan

Sataun dalam pangguluangan

Usahkan masiak layua pun tido

Kononlah pulo di pinang nyo

Pinang si erak-ero manih

Tumbuahnyo di kida rumah

Tingginyo panjek-panjek an

Randahnyo jangkau-jangkau an

Pucuak malepai awan putiah

Sataun tupai dek mamanjek

Larang basuo jo buahnyo

Salorong kapado di gambia nyo

Gambia kuniang sarupo dadiah

Buatan puti sari lamak

Manihnyo tingga di lidah

Kaleknyo tingga di rangkuangan

Daun malayok ka lautan

Tibo di pulau batebaran

Kok konon pulo di sadahnyo

Sadah putiah ambun bajano

Dibasuah jo aia bungo

Di pati jo pati santan

Dikipeh jo ambai-ambai

Dipalik jo jari manih

Dikisa ka jari tunjuak

Mambayang ka tapak tangan

Sapalik sapuluah ameh

Sakadam sakati limo

Arago nan tidak taharagoi

Harago satimbang jo nagari

Makanan anak rajo-rajo

Jo panenan bibia puti-puti

Pihak kapado timbakaunyo

Timbakau aluih ambun bajelo

Bijonyo datang dari ruhum

Pakirim si dayang di lautan

Dibao anak sutan bentan

Didaki anak garagasi

Saeto panjang jaluanyo

Bajamua di biliak dalam

Bapantang masiak dek paneh

Masiak dek ambun tangah malam

Tanam siriah tanamlah udang

Tanam karakok di halaman

Cabiak siriah gatoklah pinang

Gilianglah rokok pamenan tangan

Mudiakkan sawah di alai

Hiliakan sawah taruko

Kok banyak bana siriah di balai

Sado iko dalam carano

Ayam putiah tabang batali

Di lurah mangko maraok

Batalua di rumpun sariak

Anak nyo turun salapan

Makan lah siriah pinang kami

Bapatah mangko disingkok

Baibaraik mangko dicabiak

Capak nyo bari bajunjuangan

 Kahadapan niniak dengan mamak

Sarato alek tangah rumah

Alamaik bakeh sutan parpatiah

Alek

Alah sampai sutan bandaro

Pangka

Dibilang alah

Alek

Ruponyo sapanjang buah panitahan

Nan tatabua ka nan banyak

Nan talayang ka tangah-tangah

Talimpah kapado ambo

Kalau didanga lah baiak buni

Dipandang lah rancak rupo

Lah bunta sawah nan sapiriang

Lah masak cando padinyo

Tapi samantang pun baitu

Dek padi bukan satangkai

Dek pipik bukan saikua

Dek padi bukan satangkai

Masak nan indak sakali ambiak

Dek pipik bukan saikua

Tabang nan indak sakali raok

Apolah sabab dek baitu

Karano kami lai baduo jo batigo

Dihadapan niniak jo mamak

Sarato imam dengan khatib

Cukuik jo alek nan banyak ko

Mako ka ambo cubo marantang panjang

Untuang taserak jalo suto

Kok untuang ikan nan buliah

Kok indak ameh tantangannyo

Sakironyo ambo bao bakato baiyo, bajalan bamolah

Lai kok adat nan baitu

Lai koh pusako nan bak kian

Bapambarian sutan tantang itu ’ah

Pangka

Lah banamo sampai dek sutan parpatiah’

Alek

Alah

Pangka

Tapi tantangan sambah manyambah

Randah dianjuang tinggi

Ketek diamba gadang

Ampun jo maaf dimintak

Rundiangan dikumbalikan kabakeh sutan

Alek

Manitahlah sutan

Pangka

Ruponyo parundiangan nan kan dikumbalikan kabakeh sutan

Nan manjadi buah kabanaran dek sutan maadok kabadan diri ambo

Dek karano kami lai baduo batigo

Dihadapan ado niniak mamak

Sarato alek nan banyak ko

Nak mancubo mampaiyo mampatido-kan satantangan kato nan kamanjawab tantang gayuang nan ka manyambuik

Lai kok adat nan baitu

Lai kok pasa nan bak kian

Kan baitu kato sutan tadi

Alek

Iyolah

Pangka

Iyo baitu nan biaso nan bapakai

Alah digarih makan paek

Dapek surang dibulati

Dapek badua batigo dipaiyokan

Baa to nyo kini

Asa lai dapek surang lai ka dibulati

Dapek baduo batigo ka dipaiyokan

Alah rancak bana nyo sutan ‘a

Alek

Lah sampai dek sutan bandaro

Pangka

Lah sampai

Alek

Dek ambo muluik sapatah itu bana nan ambo nanti, sutan

Rundiang sabuah nan ambo tunggu

Baa to nyo lai kini

Umpamo lah gugua dari tampuak

Umpamo lah sakah dari dahan

Insyaallah ambo paiyokan

Lai jo saba sutan mananti

Pangka

Jo saba ambo nanti sutan

Alek

Nan parundiangan kito kini ko

Pangka

Dibateh

2.  MAMPALEGAKAN KATO (SAMO ALEK)

Alek 1

Mak sutan mudo

Alek 2

Lai

Alek 1

Jo sambah mamak ambo jalang

Alek 2

Manitahlah

Alek 1

Ruponyo kiniko lah tibo pulo sambah jo titah dari pado pihak sipangka

Apolah nan manjadi buah parun-diangan dari baliau itu

Satantang carano nan lah katangah, nan barisi siriah jo pinang sarato gambia jo sadahnyo

Nan kandak dari pado pihak sipangka kiniko

Kok siriah mintak dicabiak

Kok pinangnyo mintak digatok

Iko nan mintak bana ambo ka mamak Kok dari ma ka tumbuahnyo

Bapancarian mamak tantang itu

Alek 2

Alah sampai sutan parpatiah

Alek 1

Alah sampai

Alek 2

Aratinyo sambah jo titah nan jo sutan sajo diamba gadang dianjuang tinggi

Nan manjadi buah panitahan dek sutan samaso nan cako

Karano lah tibo pulo ulak dari karajo nan bapokok silang nan bapangka

Alek 1

Iyolah

Alek 2

Nan manjadi ulak dek karajo nan bapokok silang nan bapangka

Kok pandang jauah balayangkan

Pandangan ampia batukiakkan

Lah basugiro sipokok sipangkalan Manataiang carano nan ka tangah

Kok siriahnyo mintak dicabiak

Pinangnyo mintak digatok niniak jo mamak sarato jo guru nan pai sabondong pulang satampuah suruik

Kan iko bana isi panitahan sutan parpatiah

Alek 1

Iyo lah

Alek 2

Isi panitahan sutan parpatiah iyolah didalam adat jo pusako

Tapi sungguahpun lah didalam adat jo pusako, karano kito duduak dihadapan ninian jo mamak sarato guru dan

sialek karapatan tangah rumah lai hadir duduak

Lamak siriah di lega carano

Lamak buni di lega kato

Barajo kato mupakaik

Nan bana kato baiyo

Dibao kato tu jo mupakaik untuk manjapuik an nan kabari nyo

Mananti sutan jo panitahan

Alek 1

Mananti ambo mak

3.      MAMPALEGAKAN KATO SAKALI LAI  (Samo Alek)

Alek 2

Inyiak datuak Rajo Ameh

Alek 3

Manitahlah

Alek 2

Panitahan batibokan bakeh inyiak

Alek 3

Manitahlah

Alek 2

Adaik barundiang jo inyiak, bari maaf ambo dulu nyiak ’a

Alek 3

Pado Allah

Alek 2

Aratinyo sambah jo titah nan ka ambo tibokan kabakeh inyiak, nan bak kini nangko

Karano lah tibo ulak dari karajo nan bapokok silang nan bapangka

Nan manjadi ulak dek karajo nan bapokok silang nan bapangka,

Pandang jauah balayangkan

Pandangan ampia batukiakkan

Lah basugiro sipokok sipangkalan

Manatiang carano nan ka tangah

Kok carano nan katangah

Kok siriahnyo mintak dicabiak

Pinangnyo mintak digatok niniak jo mamak sarato jo guru karapatan tangah rumah

Taranta jo panitahan bakeh ambo lah bajawab

Nan kabarinyo kapado karajo nan bapokok silang nan bapangka, diadat kato nan baiyo jalan bamuah,

Itu nan bajapuik an ka inyiak

Alek 3

Lah sampai buah panitahan sutan mudo

Alek 2

Alah

Alek 3

Aratinyo sambah manyambah kapado allah dikumbalikan

Nan manjadi panitahan dek sutan mudo itu nan bak cako

Sapanjang buah panitahan sutan mudo itu cako indak diulang panjang

Kok diulang bana itu juo nan kadisabuik

Dang kato itu nan manjadi panitahan karajo nan bapokok silang nan bapangka

Kandak kan biaso babari pintak biaso bapalakukan

Tapi sungguahpun kandak biaso babari pintak biaso balaku namonyo itu kini

Kok lai nan ka tukuak tambahnyo Bana baanta sampai ka sutan mudo tu ’ah

Alek 2

Lah sampai di inyiak

Alek 3

Alah

Alek 2

Aratinyo sambah jo titah nan di inyiak sajo nan diamba gadang dianjung tinggi

Samaso nan cako taranta dek ambo panitahan kabakeh inyiak

Baa tibonyo dek inyiak

Kok kandak sakiro-kiro babari

Lambak lampisan diateh nantun

Kok lai ka tukuak tambahnyo

Bana basarahkan ka sutan mudo

Kan iko bana isi panitahan inyiak

Alek 3

Iyolah

Alek 2

Indak lai kok baitu buah barinyo dek inyiak

Dek hujan bapuhun paneh barasa

Ambo anta an ka asa nyo nyiak

Alek 3

Indak diulang panjang panitahan sutan mudo

Diulang itu juo nan ka disabuik

Takato sutan mudo ka maanta ka asanyo

Lah dalam adat rasonyo

Alek 2

Ambo anta an ka asanyo nyiak

4.  MAMULANGKAN KATO KA ASA ( SAMO ALEK )

Alek 2

Datuak parpatiah

Alek 1

Sabuiklah mak

Alek 2

Aratinyo sambah jo titah nan cako sajo diamba gadang dianjuang tinggi

Samaso nan cako taranta panitahan dek sutan parpatih kabakeh ambo

Alek 1

Iyo

Alek 2

Baa tibonyo di ambo

Alah ambo bao bakato baiyo bajalan bamuah

Pado niniak jo mamak sarato jo guru dan sialek karapatan tangah rumah

Dapeklah kato nan saiyo

Kabulatan kato samupakaik

Sabanyak parmintaan karajo nan bapokok silang nan bapangka sakiro-kiro babari

Lambak lampisan diateh nantun

Aratinyo bana sutan parpatih juo nan ka maanta sampai kapado karajo nan bapokok silang nan bapangka

Sakian bana dianta sampai ka sutan parpatiah

Alek 1

Alah sampai mak sutan mudo

Alek 2

Alah

Alek 1

Sapanjang pituah mamak tadi

Insyaallah ambo amalkan

Akan tatapi kok iyo ka tumbuah dari pado ambo juo

Diambo nan ka jadi pintak jo pinto kapado mamak kiniko

Kok talatak ditapi iyo bakatangahkan

Kok talatak ditangah bapaliharo dek mamak kiniko tuah

Alek 2

Insyaallah

5.     MAMULANGKAN KATO  KA PANGKA

Alek

Maa nyo Sutan Bandaro

Pangka

Manitahlah

Alek

Sambah tibo pado sutan

Jo kabanaran sutan ambo jalang

Tapi sungguahpun jo kabanaran sutan ambo jalang

Rila jo maaf dipuhunkan

Adopun antaro ambo jo sutan cako

Panek nak jadi parantian

Patang nak jadi pamalaman

Iyo disatantang bakato baiyo bajalan bamulah

Ulunyo lah ambo mudiak i

Muaronyo alah ambo iliri

Ditapak sapanjang alua

Taga dek patuah ka nan tuo sutan

Nan tuo patuah ka pangulu

Ruponyo satantangan kato ka manjawab, gayuang nan kamanyam-buik

Tatumpah juo ka diri ambo

Tapi sawajah dari pado itu

Saketek nan marusuah nan manggamang diambo kiniko sutan

Kalau nan sahandaknyo,

Kan iyo sabanyak tanyo sabanyak jawab

Sabanyak gayuang sabanyak sambuik

Baa to nyo lai kini

Kok indak taulang bak manyapuah

Indak tabaliak bak mamanggang

Ka baa kolah

Iko nan ambo pulangkan ka sutan kini ko ’ah

Pangka

Lah banamo sampai dek sutan parpatih

Alek

Sakiro alah

Pangka

Ruponyo nan manjadi buah panitahan dek sutan mahadok kaateh badan diri ambo

Iyo malah jikok baa dihati andaknyo, di ukuran nan sampai dibilangan nan cukuik,

Iyo sabanyak gayuang sabanyak sambuik

Sabanyak kato sabanyak jawab

Baa to nyo kini

Kok indak taulang bak manyapuah

Kok indak tabaliak bak mamanggang

Ka baa ko lah

Kan baitu kato sutan

Alek

Yoo lah

Pangka

Dek ambo kaji nan marusuah nan

manggamang

Iyo kaji nan saganok itu

Gayuang kok indak basambuik kato kok indak dijawab

Baa satantang itu

Asa kan kato lai kan bajawab

Asa kan gayuang lai ka basambuik

Indak kan diuji samo merah

Indak kan dikati samo barek

Panjang jo singkek kapado Allah disarahkan

Alek

Alhamdulillah ka jawek nyo sutan

Ambo sangko tadi tu

Kok ka balari samo kancang

Kok ka baramuak samo dalam

Indak doh lai

Di ateh kami sagalo alek tagak nan bapusu, duduak nan baropok

Nak ambo bayiakan amanah nan bapagang

Nak ambo lansaikan utang tapabuek

Alah ka dalam bana tu sutan

Pangka

Taruihkan

Alek

Sairing balam jo barabah

Balam tabang barabah mandi

Sairiang salam dengan sambah

Salam datang sambah kumbali

Kumbali juo ka pado sutan

Maa nyo sutan bandaro

Pangka

Taruihkan

Alek

Anak ayam pandai baranang

Dapek kakinyo dek buayo

Duduaklah sutan jo batanang

Ambo ka mulai jo bicaro

Adopun satantang buah panitahan cako

Taserak nak ambo piliah

Dipiliahlah lalu dikampuangkan

Kok anyuik nak ambo sonsong

Disonsong lalu ka ulunyo

Apolah kini panitahan sutan

Dek carano alah ka tangah

Sarek barisi kalangkapan

Mako jikok maliek diateh rupo

Basiang diateh tumbuah

Tumbuah sarupo iko kini

Siriah sacabiak mintak dikunyah

Pinang sagaiang mintak digatok

Dipipia gambia dipalik sadah

Dek kami alek nan datang

Kan iyo baitu lalu panitahan sutan

Pangka

Yoo lah

Alek

Takilek camin di udaro

Jatuah kalauik batu karang

Hilang disemba ikan hiu

Dek bana sambah nan tibo

Lahianyo kapado ambo surang

Dibatin kapado alek jamu

Kato warih kato bajawek

Kato pusako ka batolong

Dituruik papatah jo patitih

Basuo pamenan adat

Batanun kulindan suto

Sajalan ragi jo banang

Suri dimano talataknyo

Layang malayang sambah tibo

Timpo batimpo sambah datang

Titah ka ambo ta antaknyo

Kato tapegang dek pangulu

Rundiang tasimpan di nan rapek

Awa jo akia kok sapakaik

Lahi jo batin kok sasuai

Pihak jo kato ka majawab

Iyo jo gayuang ka manyambuik

Tapek diambo tarabiknyo

Sungguah diambo tarabiknyo

Nyato adat baateh tumbuah

Nyato pusako ba inggiran

Bacupak talago panuah

Bagantang si maharajo lelo

Undang-undang ma isi kandak

Karano sabab dek baitu

Kato iyo kato baturuik

Kato indak kato mati

kato antah kato tatagun

Uia kato, uhun kato

Subhat kato mambunuah

Usah basuo nan bak kian

Mako digiliangkanlah kato jo mupakaik

Dikaka rundiang jo nan patuik

Dapeklah kato nan bulek

Nan buleknyo indak basagi

Kinilah buliah digolongkan

Kok picaknyo indak basuduik

Picak lah dapek dilayangkan

Tibo kami dipabasokan

Basapu laman nan sabidang

Takuak pintu bakeh lalu

Tabantang lapiak parmadani

Talatak siriah dicarano

Tando alamat putiah hati

Sanang lah bana dalam hati

Baa lah bana sanang hati

Dek malin indak tabacokan

Dek tukang alun talukihkan

Allah sajo nan ka tahu

Nan bak sakarang kini nangko

Pihak dek kami alek sutan

Alahlah sa ujo lah salapeh

Satanai salatakkan

Salalah takaja untuk manarimo siriah sutan

Tapi samantang pun baitu

Adopun masak siriahko tigo parkaro

Partamo masak di gagang

Kaduo masak di makan

Katigo masak dimupakaik

Dikatokan masak digagang

Rononyo kuniang mangarisiak

Tampuak layua daun lah kucuik

Dek ulek indak talamakkan

Dek samuik haram tajalani

Nyampang gugua manjalang tanah

Jan dicinto ka junjuang lai

Tampan ka jadi sarok sajo

Dalia nasakah siriah masak

Tasabuik masak dimakan

Sadang tangkai lai bagatah

Maso daun lai baminyak

Gilo dikijok pinang mudo

Dek dirayu sadah jo gambia

Bararak lalu ka carano

Diupang manjadi satu

Dikunyah mamerah bibia

Kaleknyo tingga di rakuangan

Sari nyo naiak ka paroman

Kok dikatokan masak di mupakaik

Alun dicaliak lah tapandang

Lak jaleh bangun rauiknyo

Alun dikicok lah taraso

Lah nyato lamak sarinyo

Salorong siriah nan ka tangah

Lah nyato bukan masak digagang

Tapi indak pulo kan dimasakkan jo bamerah bibia doh

Izin jo rila dari sutan

Siriah ka masak jo mupakaik

Alun bakilek lah bakalam

Bulanlah sangkap tigo puluah

Alun diliek lah dimakan

Raso lah tibo dalam tubuah

Sakian sambah dipuhunkan

Pangka

Lah sampai dek sutan parpatiah

Alek

Sampai

Pangka

Sapanjang parundiangan sutan tadi

Kok siriah kami alah batarimo

Ditarimo bukan dimakan

Dimasakkan sajo jo mupakaik

Balun diliek lah tamakan

Raso lah tibo dalam tubuah

Kan baitu kato sutan

Alek

Alah

Pangka

Urek sinyali-nyali rateh

Pucuak surian mudo-mudo

Dilangik sutan lalu linteh

Ambo dibaliak itu pulo

Baa tu nyo nan manjadi alasan dek sutan

Maadok kaateh badan diri ambo

Tantu mancancang lai balandasan

Maredeh lai bapamacik

Baa tu nyo kini

Dek sutan babaso ateh nan ado

Ko agak marusuah manggamang dek kami ko sutan ’a

Alek

Alah sampai dek sutan bandaro

Pangka

Alah

Alek

Satantang siriah sutan nan alah katangah

Lah kami tarimo jo suko hati

Tapi indak kan bamakan bamerah bibia doh sutan

Ka bamasakkan sajo jo karelahan

Baa sabab mangko baitu

Karano kami alek sutan nan pai sabondong pulang satampuah

Banyak tadiri dari anak mudo matah

Nan indak tabiasokan makan siriah

Jadi di kami nan marusuah nan manggamang pulo pihak si alek kiniko

Nyampang siriah sutan kami cabiak

Pinang nyo indak digatok

Tantu indak rancak dipandang rupo

Indak lamak dimakan raso

Sabab sutan ka mamandangi kami bak paneh dalam baluka

Derek di padang lalang

Iko nan marusuah nan manggamang

Sakitu sambah pado sutan

Pangka

Alah sampai dek sutan parpatiah

Alek

Alah sampai

Pangka

Kok kan dimakan siriah jo mupakaik

Alah kok dalam adaik sutan

Alek

Sutan bandaro

Pangka

Taruihkan sutan

Alek

Lah tibo pulo tanyo dari sutan

Kok siriah pangka indak kabamakan jo basirah bibia

Dimasakkan sajo jo mupakaik

Alah koh dalam adaik

Kan baitu tanyo sutan tadi tu ’ah

Pangka

Yoo lah

Alek

Alah lah dalam adaik bana nan baitu sutan

Karano nan dikatokan adaik itu kato mupakaik

Nan rajo kato saiyo

Andaikato hasil kato mupakaik nan dibarikan kapado kami

Itulah nan dikatokan adat nan diadatkan

Jadi alah taracak di pusako

Alah basuo dalam adaik

Sakitu sambah pado sutan

Pangka

Iyo, lah sampai dek sutan parpatiah

Alek

Alah sampai

Pangka

Ambo bao jo kato mupakaik dulu sutan parpatih

Alek

Mananti ambo

6. MAMPALEGAKAN KATO SAMO PANGKA

Pangka 1

Maa nyo mak Sutan Rajo Bunsu

Pangka 2

Manitahlah

Pangka 1

Ruponyo parundiangan ditibokan kabakeh amak kinitu

Dek karano siriah kito indak ka bamakan basirah bibia dek si alek jamu doh, ka bamakan jo mupakaik

Baa dek kito

Pangka 2

Lah sampai dek sutan

Pangka 1

Dibilang alah

Pangka 2

Indak kan dirantang panjang

Diulang disinan juo ka tibonyo

Dek arok raso ka buliah

Cameh raso kahilangan

Babao duduak kiniko jo silang nan bapangka karakok nan bajunjuang

Jo niniak mamak nan duo batigo

Babao duduak baiyo jalan bamuah

Mananti sutan sakutiko

Lai manurut adat nan baitu

Pangka 1

Lah didalam adaik tu

Pangka 2

Ambo bao sutan

Pangka 1

Taruihkanlah

7.  MAMPALEGAKAN KATO SAKALI LAI (SAMO PANGKA)

Pangka 2

Amak Datuak Bunsu

Pangka 3

Manitahlah

Pangka 2

Aratinyo sambah manyambah kapado Allah kito kumbalikan

Parundiangan baantakan kabakeh inyiak

Pangka 3

Manitahlah

Pangka 2

Ruponyo lah tibo olak olai dari silang nan bapangka karajo nan bapokok

Dek sialek nan datang namonyo kinitu

Nan ka manjadi buah jo bari dek baliau kinitu

Disiriah nan katangah ruponyo kiniko

Kok masaknyo indak masak bakunyah

Tapi dimasakkan jo mupakaik

Ikolah duduak baiyo jalan bamuah ambo jo angku kini

Pangka 3

Artinyo sambah jo titah nan cako sajo diamba gadang dianjuang tinggi

Nan manjadi buah panitahan dek sutan rajo bungsu

Dang kato lah ulak dari niniak jo mamak saratu guru jo si alek nan karapatan tangah rumah

Pangka 2

Dst

Pangka 3

Dst

8.  MAMULANGKAN KATO KA ALEK

Pangka

Maa Sutan  Parpatiah

Alek

Manitahlah

Pangka

Ruponyo kandak sutan tadi lah ambo paiyo patidokan

Lah dapek golek nan sagolek

Tantang kandak sutan tu

Lai kami izinkan

Cuma putiah hati nan bakaadaan

Putiah kapeh nak kalihatan

Nak basiang bak hari nak batarang nan bak bulan ko sutan ’a

Alek

Indak sarantak kami makan siriah

ai barilahkan tu sutan

Pangka

Jo rilah kami

Alak

Alhamdulillah

Tapi pintak jo pinto dek kami si alek kiniko

Iyo nak sarantak makan jo pangka nyo

Pangka

Insyaallah

Bagian II

PASAMBAHAN SIRIAH

Dari : ikkmduri.wordpress.com

Kaganti rokok nan sabatang, Tukaran sirih nan sakapua,
Kaguno bajawek tangan,
Assalamualaikum warrah matullahi wabarakatuh.

Jan salam salam disambah, Samo mandoa kapado Allah
Samo salawat kapado Nabi, Junjungan sagalo Alam
Manyurek di ateh pintu, Mangarang di tapak tangan
Malompek nak basitumpu, Mancancang nak balandasan
Di Sutan tibonyo sambah.

Manolah Sutan janyo hambo, Sakali hambo mahimbau,
Sapatah rundiang nan lalu, Walaupun Sutan saurang nan tahimbau,
Batin dek adat kasadonyo. pangana batin ka nan rapek,
ujuiknyo sambah ka nan banyak, Sambah sujuik salam tasimpuah.
Saarek bungka nan piawai, Naraco luruih main  dau,
Indak basibak jo basisiah Bukan bahinggo jo babateh,
Sambah tajelo ka nan rapek, Kapado sagalo nan taduduak ateh majelih.

Ninik mamak panghulu Pamangku Adat, Nan  Gadang basa Batuah
Ibarat kayu baringin di tangah koto, Ureknyo limbago matan
Babatang sandi andiko, Badahan cupak jo gantang
Barantiang barih balabeh, Babungo mungkin jo patuik
Badaun rimbun dek adat, Babuah kato nan bana
Inggiran silang jo salisiah, Daun rinbum tampek balinduang
Tampek balinduang kapanasan, bakeh bataduah kahujanan.

Alim ulama suluah bendang, Suluah nan tarang di nagari
Nan tahu di halal dengan haram, Tahu di syah dengan batal
Nan pandai balapa ba  maana, Tahu di syariat jo hakikat
Bakeh batanyo lahia jo batin, Nan tahu di hadis dengan dalil.

Cadiak pandai pagaran kokoh, Nan tahu di runciang ka mancucuak
Sarato anak ka manyangkuik, Tahu di anging nan basuruik
Sarato ombak nan basabuang, Tahu di alamat kato sampai
Tahu di raso jo pareso,alun bakilek lah bakalam
Bulan lah sangkok tigo puluah, Balun dilihek lah dimakan,
Raso lah tibo dalam tubuah, Takilek ikan dalam ayie,
Ikan takilek jalo tibo, Lah tantu jantan batinonyo,
Itulah kilek dengan bayang.

Nan mudo pambimbiang dunia, Nan capek kaki ringan tangan
Capek kaki indak panaruang, Ringan tangan bukan pamacah
aso tarantang duo susah, Nan bahati suci bamuko janiah
Ayam nan tangkeh di galanggang, Ancang-ancang dalam nagari.

Kapado sagolo Bundo Kanduang, limpapeh rumah nan gadang
Umbun paruak pegangan kunci, Umbun puruak saluang bunian
Hiasan anjuang nan tinggi, Sumarak kampuang jo halaman
Sumarak kato jo nagari, Sumangek rumah jo tanggo
Kok hiduik tampek banasa, Kok mati tampek baniat,
Ka unduang-unduang ka Madinah, Ka payuang panji ka sarugo,

Sambah di Sutan di sambahkan
Unjuik sambah nan taunjuak, Nyato tawalak ka ukuran
Tabayang barih jo balabeh, Nyato bak andai kato bidal
Dek curiang barih dahulu, Dek adai pusako lamo
Kalau basiang dinan tumbuah, Jikok manimbang dinan ado,
Tumbuah sarupo iko kini
Manuruik papatah cupak gantang, Dek banyak ragu kok tibo
Dek lamo lupo kok datang, Manusia basifat khilaf
Agak kok ragu juaronyo, Nan tinggi kok kurang anjuang
Nan gadang kok kurang ambah, Sabab dek sasak dengan sampik
Aluran di ateh kok di bawah, Patuik di tangah kok di tapi
Kok kurang sanang sajahtaro, Kok kurang aman jo santoso
Disusun jari nan sapuluah, Ditukuak kapalo nan satu
Maaf diminta banyak-banyak, Izin jo rela dari sutan.

Limbak nan daripado itu,
Adat nan duo salanggano, Cancang nan duo salandasan,
Puntiang talantak ka hulu, Dibawah kiliran taji,
Asa rundinag kato dahulu, Tigo limbago nan tajadi,
Partamo sambah manyambah, Kaduo baso jo basi, Katigo sirieh dengan pinang
Sambah manyambah dalam adat, Tali batali undang-undang
Tasabuik bamuluik manih, Tapakai baso jo basi, Sarato hereng dengan gendeang
Muluik manih pangarang baso, Budi baiak tali pikatan
Iyo carano rang namokan, Kiasan Alam Minangkabau
Ramo-ramo tabang malayang, Malayang ka Koto Tangah
Banyak nan ampek puluah ampek, Indah carano bukan kapalang
Talatak di tangah-tangah, Dilingkuang urang nan rapek
Itu carano pulang pai, Dari sipakok ka panggilan
Dari pangka lalu ka ujuang, Talayok ka ruang tangah
Talayang ka ruang tapi, Sampai tabujua di lintangi
Nyato taunjuak bakeh Datuk, Tibo di muko nan basamo.

Carano banamo Carano Basa, Datang nan dari tanah Banja
Buatan tukang Reno Ali, Buatan tukan Sungai Pua
Elok carano bukan kapalang, Carano bak tiuang ka tabang
Baukia bamego-mego, Batata bapucuak  rabuang
Panuah barisi kalangkapan, Limo bak bilangan jari
Kaganti baso jo basi, Iyolah ajaran Adat basandi Syarak
Apolah jinih kalangkapan, Partamo sadah kaduo sirieh
Katigo pinang kaampek Gambia, Kalimo timbakau
Larang kapado nan sadahnyo, Sadahnyo langkitang gadang
Dibasuah jo ayie ambun, Babasuah jo pati santan
Dihambuih jo lingka Cino, Dikipeh jo ambi-ambi
Putiah nan bak banak dalam,  Dipalik jo jari manih
Bakisa ka jari tangah, Mambayang ka tapak tangan
Usah ka usak makin panuah, Itulah kato bakiasan
Tanamo urang Minangkabau, Manyambah Tuhan nan Aso
Sumbayang limo wakatu, Adat basandi syarak
Syarak basandi Kitabullah, Syarak mangato adat mamakai.
Lorong kapado nan siriehnyo, Kiasan takanduang di dalamnyo
Adat bagaua dalam hiduik, Mamakai budi nan baiak
Siriehnya udang tampak hari, Sirieh timbalan kuku balam
Gagangnyo bapantang putuih, Buahnyo diambiak ka tinaman
Daun diambiak ka kusuak mandi, Usah ka ratak rintiah tido
Usah ka layua makin hiduik, Itulah budi dengan malu
Nan tuo di hormati, Nan ketek dikasihi
Samo gadang bawok bakawan, Nan gadang jan malendo
Nan panjang jan malindih.

Lorong kapado nan pinangnyo, Pinang batuntuk jo baruntun
Bak bawang dibalah duo, Bak dusun dibalah ampek
Kiasan takanduang di dalamnyo, Salamo hiduik di dunia
Barek samo dipikua, Ringan samo dijinjiang
Saciok umpamo ayam, Sadanciang ibarat basi
Sakato lahia jo batin, Sasuai muluik jo hati
Iyo  sakabek nan bak lidih, Nyato sarumpun nan bak sarai
Iyo salubang nan bak tabu,  Elok saikek nan bak sirieh.

Lorong kapado nan gambianyo, kaba barito kami danga
Buatan Puti Sarilamak, Sapipiah jatuah ka sirieh
Mambayang sampai ka muko, Sirahnyo tampak di bibia
Lamaknyo tingga di rangkuangan, Parisonyo maruang tubuah
Sehat anggota katujuahnyo
Kato bakieh baibarat, Kiasan takanduang di dalamnyo
Duduak sorang basampik-sampik, Duduak basamo-samo balapang-lapang
Kato surang dibulati, Kato basamo dipaiyokan
Dibulekkan ayie ka pambuluah, Dibulekkan kato ka mupakat
Bulek baru di golekkan, Pipiah baru dilayangkan
Bulek jan basuduik, picak jan basandiang
Data bak lantai papan, Licin bak dindiang camin
Tapauik makanan lantak, Takuruang makanan kunci.

Lorong kapado nan santonyo, Huluih sayiknyo dek maracik
Banamo timbakau Jawo, Racik tukang dari Piobang
Saheto panjang jaluanyo, Harum satahun pajalanan
Kiasan takanduang di dalamnyo, Adat hiduik di Minangkabau
Jauah jalang manjalang, Dakek cinto mancinto
Kok rusuah iyo bapujuak, Tagamang nyato bajawek
Hanyuik patuik dipintesi, Tarapuang nyato bakaik
Kok condong iyo batungkek,
Lamah makanan tueh, Nan panjang makanan Karek,
Nan singkek makanan uleh, Nan ado samo dimakan
Nan indak samo dicari, Mandapek samo balabo, Kahilangan samo marugi.

Hati gajah samo dilapah, Hati tungau samo dilapeh
Kok kurang tukuak manukuak, Senteng bilai mambilai
Malangkah di ujuang karih, Basilek di pangka padang
Kato adat salalu baumpamo, Rundiang salalu bakiasan
Didalam adat nyato basuo, Papatah patitih mangatokan
Pituah kato pusako, Pusako ninik mayang nan dahulu
Gulamo mudiak ka hulu, Mati disemba ikan tilan
Kanailah anak bada balang, Pusako ninik mamak nan dahulu
Kini manjadi undang-undang.

Manolah Sutan janyo hambo
Dek alua manantang bana, Dek luruih tujuan kato
Ibarat saluang pauleh angok, Titian ayie polongan asok
Dari ninik dengan mamak, Sipokok alek namonyo kato
Nan sakarang kini nangko, Nan sampai niat jo mukasuik
Ujuik paham nan nyo jaleh, Sadang kutiko bungo kambang
Sirieh sahalai nan bacabiak, Pinang sabuah nak bagatok
Gambia sabuah nan bapipia, Sadah di cupu nan bapalik
Rokok sabatang iyo baisok, Sirieh sakapua rang namokan
Tanam sirieh tanamlah pinang, Tanam karakok di halaman
cabiak sirieh gatoklah pinang, Giliang rokok pamenan tangan
Itulah jinih sambah kami, Sambah alah salam lah tibo
Kato bana sungguah di bari, Harapan kami nan basamo
Marabah sadundun dengan balam, Sikok barulang pai mandi
Sambah sadundun dengan salam, Kato dimintak babunisi
Sakian sambah pado nan banyak.

Bagian III

SIRIAH PINANG

( MAMBUKA NIAT DARI SI ALEK)

Dari : home-pyk.blogspot.com

Datuak Marajo :
Assalamualaikum ww.
Ma nyo datuak Marajo...
Sungguahpun datuak surang jo baduo nan taimbau
ujuik nyo sambah ka nan basamo.

Niniak mamak jo panghulu,
nan gadang basa batuah,
andiko jo hulu balang,
cadiak pandai alim ulamo,
nan mudo arif budiman,
bundo kanduang samo di dalam,
dalam pasambahan ambo juo.

Adopun sambah nan ka dipasambahkan taradok ka badan diri datuak nan basamo,
dek lah sudah minum jo makan,
kok bakato sasudah makan,
kok barundiang sasudah minum,
pintak jo pinto ka dilaluan kapado datuak.

Ka di bukak niat dihati,
ka dikombang nasar didado,
nan taragak dihati kami,
olah kok luruih bona ka kami sabuik,
kok olah kok olunnyo io minta pituah dari datuak,
sakian sombah nan ka dipasombahkan pado datuak,
diharok bunyi hendak kumbali, sakiannyo tuak.

Datuak Naro Sati    : Lah sampai dek datuak.
Datuak Marajo       : Sampai tuak.

Datuak Naro Sati    ;
Nan  sapanjang parundiangan datuak nan mandatang kapado kami,
pado wakatu iko kini.
Indak ka ditikam jajak,
ditikam jajak kok cupua,
diulang kato kok batimbang,
ujuangnyo sajo kami ambiak,
diambiak sakiro ka baguno.

Nan bak andai kato datuak cako,
dek lah sudah minum jo makan,
kok bakato sasudah makan,
kok barundiang sasudah minum,
pintak jo pinto ka dilaluan kapado datuak,
kan baitu bona ujuang parundiangan datuak ?

Datuak Marajo     : Yo bona baitu tuak.
Datuak Naro Sati  :
Dek kami nan jadi sauik jo saponyo,
tumbuah sarupo iko kini.
kok lai putiak nan ba kuncuang,
nan didalam bungo kambang,
nak osah jadi buah,
elok lah datuak laiakan katiko bak kini.

Katiko duduak di nan rapek,
di muko kito nan basamo,
nak osah siang bak hari,
nak nyato torang bak bulan,
elok datuak bapambori,
kami utang nan manarimo,
sakian sajo dari kami tuak,
maklum datuak tontang itu.

Datuak Marajo     : Lah sampai dek datuak
Datuak Naro Sati  : Sakiro alah tuak.

Datuak Marajo    : Kami palalu lai tuak !
Datuak Naro Sati ; Palalu lah tuak.

Datauk Marajo    :
Dibukak niat dihati,
dikombang nasar didado,
nan taragak dihati kami,
kok io lah luruih kak kami sabuik.

Nan bak kato undang jo bida juo tuak,
talotak puntiang dihulu,
dibawah kiliran taji,
asa mulo kato dahulu,
tigo limbago nan tajadi.

Partamo sambah manyambah,
manganduang puji-pujian,
kaduo baso jo basi,
maniliak ereang jo gendeng,
katigo siriah jo pinang,
baisi pinta jo pinto.

Sambah manyambah di dalam adat,
tali batali undang2,
tasobuik ba muluik manih ,
tapakai babaso baik.
Muluik manih talempong kato,
baso baik gulo dibibia,
kondak adaik jo pusako tuak,
talayang siriah jo pinang,
lah taunjuak ka muko datuak.

Siriah saolai mintak dikunyah tuak,
pinang sadidih minta digotok,
cabiak siriah gotoklah pinang tuak,
baitu jinih buah pasambahan ,
diharok kato hendak kumbali,
sakian sajo dari kami tuak.

Datuak Naro Sati : Lah sampai dek datuak.
Datuak Marajo     : Sakiro alah tuak.

Datauk Naro Sati  :
Adopun sombah nan mandatang kapado kami ,
pado wakatu iko kini,
dek akmi nan ka jadi sauik josaponyo,
satontangan siriah pinang datuak nan tibo dimuko kami.
Siriah saolai ka kami cabiak tuak,
pinang sadidih ka kami gotok,
utang dek kami man palalu,
olah ka sonang hati datuak,
kami palalu lai tuak.

Datuak Marajo ; Palalu lah tuak.
                

Sasudah makan sirih

Datuak Naro Sati ; Ma nyo datuak Marajo .
Datuak Marajo    : Ambo Tuak.

Datuak Naro Sati :
Siriah lah sudah kami kunyah tuak,
pinang lah sudah kami gotok,
lah taraso lomak jo manihnyo,
sorinyo lah marasuak ka dalam tubuah,
sehat anggota kasadonyo,
sakitu dek kami nan ka jadi jawabnyo,
olah ka sonang hati datuak.

Diposkan oleh Posting Pertamaku di 09.55

Bagian IV

ALUR ROKOK JO SIRIAH

Dari : larehnanpanjang.ucoz.com

Sipangka         : Datuak Bandaro

Sialek              : Datuak Sampono

Sialek  :

Datuak Bandaro,…..Pasambahan tibo bakeh datuak.

Sipangka         : Sambah di Allah, manitah lah Datuak

Sialek  : Sambah nan di tibokan

titah nan di antakan,nak

sarapek nyolah niniak jo mamak,

sifat tarhalia di ateh rumah nangko,

usah ka dibilang di atap gala,

artinyo bana sambah sajo di muliakan.

Sambah nan di tibokan

titah nan di antakan,

ma agak hari kapatang siriah ka bacabiak, pinang bagatok,

dihadapan karib jo kabiah,

ipa jo bisan, korong jo kampuang,

sakarang alah bahadiri.

Baapo dihari nan sahari nangko,

janjang batingkek bandua batapuak,

duduak sahamparan tagak saedaran,

manimbang sapanjang adat

mangaji sapanjang alua,

ciek jo duo,duo jo tigo,

alah banamo basalasai,

kato sajo nan di pakatokan.

Picak nan salayang ulek nan sagolong

adat nan sapakai,

karib jo kabiah alah batamu,

anak jo bapak alah basuo,

duduak bahadapan tagak batantangan

maisok santo jo daun,

duduak nak baiyo tagak nak ba muah,

sakian sambah di antakan ka bakeh Datuak

Sipangka:Sampai datuak Sampono..?

Maagak i rundingan Datuak nan katangah, sunat kato dek ba ulang

pasa jalan dek batampuah,

buah panitahan datuak nan ka ambo ulang.

Sambah manyambah di pulang kapado Allah,

kato sajo dipakatokan.

Apolah nan manjadi buah kato Datuak cako,

ma agak dihari nan dahulu,

siriah nan bacabiak

pinang nan bagatok,

dihadapan karib jo kabiah,

ipa jo bisan,korong jo kampuang

nan mahadiri pakarangan nangko.

Baapo dihari nan sahari nangko,

janjang batingkek bandua batapuak,

duduak sahamparan tagak saedaran,

manimbang sapanjang adat

mangaji sapanjang alua,

ciek joduo,duo jo tigo,

alah banamo basalasai,

kato sajo nan di pakatokan.

Tumbuah nan bak banyiah

tabik nan bak padi,

tabik di siriah nan bacabiak

pinang nan bagatok,

karib jo kabiah alah batamu

anak jo bapak alah basuo,

duduak bahadapan tagak saedaran,

maisok santo jo daun,

duduak nak baiyo tagak nak ba muah,

kan baitu bana buah panitahan Datuak.?..

Sialek     : Iyo Bana..

Sipangka: Yo ma nyo Datuak Sampono,..

sapanjang buah panitahan Datuak nan ka tangah,

lamak bak raso santan

manih bak raso tangguli,

tapi sungguahpun baitu,

elok kato dek mufakaik

lamak kato dipakatokan,

ambo bao kato jo mufakaik,

saba Datuak jo panitahan,

lai koh dalam adat nan bapakai,

dalam cupak nan baisi.

Sialek     : Sampai Datuak Bandaro.?

sapanjang buah panitahan Datuak nan ka tangah,

kok di danga lah babunyi

dipandang lah barupo,

ka ateh samo ba pucuak

ka bawah samo baurek,

limbak nan daripado itu,

duduak nan samo sahamparan,

tagak nan samo saedaran,

ambo bao kato jo mufakaik,

khan baitu buah panitahan,Datuak ..?

Sipangka : Iyo Bana..

Sialek  :

Tibonyolah dalam adat nan bapakai

dalam cupak nan baisi,

kato di bao jo mufakaik Datuak…

Sipangka:

Kok baitu saba mananti ,Datuak..

Sialek     : sakiro-kiro…..

(Sipangka (Datuak Bandaro) mencari mufakat  dengan ninik mamak,alim ulama,cerdik pandai,serta yang hadir dalam pertemuan tersebut. Setelah di temui kata sepakat maka rundingan di kembalikan ke pada Si Alek)

Sipangka:

Datuak Sampono,..pasambahan tibo ka bakeh Datuak…

Hambo mambao kato jo mufakat

jo nan duduak sahamparan tagak saedaran,

picak nan salayang bulek nan sagolong

adat nan sapakai.

Sabuah kato lah dipakatokan,

labiah bak maisok santo jo daun,

itu bana nan ambo antakan ka bakeh Datuak…

Sialek     : Sampai Datuak Bandaro.?...

Dihari nan cako hambo saba jo panitahan,

Datuak marenjeang kato jo mufakat

jo nan duduak sahamparan tagak saedaran,

picak nan salayang bulek nan sagolong

adat nan sapakai,

sabuah kato lah dipakatokan,

labiah bak maisok santo jo daun,

khan baitu bana buah panitahan Datuak…

Sipangka:

Ka ateh alah samo sapucuak ka bawah lah samo baurek,nan kito ba apo nyo lai Datuak….

Sialek     :Nan Kito babateh,..

Sipangka:

Yoo..Ma nyo datuak Sampono,…

Dahulu kato basitinah kamudian kato basicapek,

iyo capek tibonyo bakeh datuak,

Maagak i rundiangan kito cako,

alah ciek jo duo,duojo tigo,

alah banamo salasai.

Sungguahpun bak raso basalasai,

Tumbuak nan bak banyiah tabik nan bak padi,

siriah naiak carano katangoh,

siriah kami nak minta Datuak kunyah,

itu bana nan di antakan ka hadapan datuak,…

Sialek     :Sampai datuak Bandaro…?

Sunat kato dek baulang,

pasa jalan dek batampuah,

buah panitahan datuak ka hambo ulang.

Apo nan jadi buah panitahan Datuakcako,

kok didanga lah babunyi dipandang lah barupo,

lamak bak raso santan manih bakraso tangguli,

nan tumbuah nan bak banyiah tabik nan bak padi.

Pihak di silang nan bapangka karakok nan bajunjuang,

pakarajaan nanbapangka,

siriah naik carano ka tangah,

sirian nan mintak di kunyah,

khan baitu buah panitahan Datuak tadi…

Sipangka: Yoo lah…

Sialek     :Yo ma datuak Bandaro….

Rundiangan Datuak nan ka tangah,

bulek lah buliah digolekan

picak lah buliah dilayangkan,

tapi sungguahpun baitu

lamak siriah lega carano,

lamak kato lega bunyi,

lamak lauak dek pamasak ,

elok kato jo maufakat,

saba Datuak jo panitahan,

lai koh dalam adat lamo pusako usang,yo baitu Datuak…

Sipangka: Kok itu yolah bana…

Datuak Sampono (Si alek) membawa kata rundiang mencari mufakat.Bagaimana cara mencari mufakat dapat di lihat pada”alur kato mufakat”

Sialek     :Yo ma datuak Bandaro….

Dihari nan cako Datuak saba jo panitahan,

hambo mambao kato jo mufakat

jo nan duduak sahamparan tagak saedaran,

sapanjang parmintaan Datuak nan ka tangah,

pintak buliah kandak balaku,

sabuah kato lah dipakatokan,

labiah bak mangunyah siriah jopinang,

itulah bana nan di antakan ka bakeh Datuak…

Sipangka: Sampai Datuak…

Kok hilia lah sarangkuah dayuang mudiak lah satimbang galah,nan kito baapo lainyo Datuak…

Sialek     :Nan kito rancak babateh….

(Sumber : Sumarak Nagari, Alur Pasambahan dan Pidato Adat Minangkabau)

Bagian V

Pasambahan Siriah

Dari : lachoga.blogspot.com

 

Kaganti rokok nan sabatang, Tukaran sirih nan sakapua,
Kaguno bajawek tangan,
Assalamualaikum warrah matullahi wabarakatuh.

Jan salam salam disambah,

Samo mandoa kapado Allah
Samo salawat kapado Nabi, Junjungan sagalo Alam
Manyurek di ateh pintu, Mangarang di tapak tangan
Malompek nak basitumpu, Mancancang nak balandasan
Di Sutan tibonyo sambah.

Manolah Sutan janyo hambo, Sakali hambo mahimbau,
Sapatah rundiang nan lalu, Walaupun Sutan saurang nan tahimbau,
Batin dek adat kasadonyo.

pangana batin ka nan rapek,
ujuiknyo sambah ka nan banyak, Sambah sujuik salam tasimpuah.
Saarek bungka nan piawai,

Naraco luruih main dau,
Indak basibak jo basisiah

Bukan bahinggo jo babateh,
Sambah tajelo ka nan rapek, Kapado sagalo nan taduduak ateh majelih.

Ninik mamak panghulu Pamangku Adat, Nan Gadang basa Batuah
Ibarat kayu baringin di tangah koto, Ureknyo limbago matan
Babatang sandi andiko, Badahan cupak jo gantang
Barantiang barih balabeh,

Babungo mungkin jo patuik
Badaun rimbun dek adat,

Babuah kato nan bana
Inggiran silang jo salisiah,

Daun rinbum tampek balinduang
Tampek balinduang kapanasan, bakeh bataduah kahujanan.

Alim ulama suluah bendang, Suluah nan tarang di nagari
Nan tahu di halal dengan haram, Tahu di syah dengan batal
Nan pandai balapa ba maana,

Tahu di syariat jo hakikat
Bakeh batanyo lahia jo batin,

Nan tahu di hadis dengan dalil.

Cadiak pandai pagaran kokoh,

Nan tahu di runciang ka mancucuak
Sarato anak ka manyangkuik,

Tahu di angin nan basuruik
Sarato ombak nan basabuang,

Tahu di alamat kato sampai
Tahu di raso jo pareso,

alun bakilek lah bakalam
Bulan lah sangkok tigo puluah, Balun dilihek lah dimakan,
Raso lah tibo dalam tubuah, Takilek ikan dalam ayie,
Ikan takilek jalo tibo,

Lah tantu jantan batinonyo,
Itulah kilek dengan bayang.

Nan mudo pambimbiang dunia, Nan capek kaki ringan tangan
Capek kaki indak panaruang, Ringan tangan bukan pamacah
aso tarantang duo susah,

Nan bahati suci bamuko janiah
Ayam nan tangkeh di galanggang, Ancang-ancang dalam nagari.

Kapado sagolo Bundo Kanduang, limpapeh rumah nan gadang
Umbun paruak pegangan kunci, Umbun puruak saluang bunian
Hiasan anjuang nan tinggi, Sumarak kampuang jo halaman
Sumarak kato jo nagari,

Sumangek rumah jo tanggo
Kok hiduik tampek banasa,

Kok mati tampek baniat,
Ka unduang-unduang ka Madinah, Ka payuang panji ka sarugo,

Sambah di Sutan di sambahkan

Unjuik sambah nan taunjuak, Nyato tawalak ka ukuran
Tabayang barih jo balabeh,

Nyato bak andai kato bidal

Dek curiang barih dahulu,

Dek adai pusako lamo
Kalau basiang dinan tumbuah, Jikok manimbang dinan ado,
Tumbuah sarupo iko kini
Manuruik papatah cupak gantang, Dek banyak ragu kok tibo
Dek lamo lupo kok datang,

Manusia basifat khilaf
Agak kok ragu juaronyo,

Nan tinggi kok kurang anjuang
Nan gadang kok kurang ambah, Sabab dek sasak dengan sampik
Aluran di ateh kok di bawah, Patuik di tangah kok di tapi
Kok kurang sanang sajahtaro,

Kok kurang aman jo santoso
Disusun jari nan sapuluah, Ditukuak kapalo nan satu
Maaf diminta banyak-banyak,

Izin jo rela dari sutan.

Limbak nan daripado itu,
Adat nan duo salanggano,

Cancang nan duo salandasan,
Puntiang talantak ka hulu, Dibawah kiliran taji,
Asa rundinag kato dahulu, Tigo limbago nan tajadi,

Partamo sambah manyambah, Kaduo baso jo basi,

Katigo sirieh dengan pinang

Sambah manyambah dalam adat, Tali batali undang-undang
Tasabuik bamuluik manih,

Tapakai baso jo basi,

Sarato hereng dengan gendeang
Muluik manih pangarang baso, Budi baiak tali pikatan
Iyo carano rang namokan,

Kiasan Alam Minangkabau

Ramo-ramo tabang malayang, Malayang ka Koto Tangah
Banyak nan ampek puluah ampek, Indah carano bukan kapalang
Talatak di tangah-tangah, Dilingkuang urang nan rapek

Itu carano pulang pai,

Dari sipakok ka panggilan
Dari pangka lalu ka ujuang, Talayok ka ruang tangah
Talayang ka ruang tapi,

Sampai tabujua di lintangi
Nyato taunjuak bakeh Datuk,

Tibo di muko nan basamo.

Carano banamo Carano Basa, Datang nan dari tanah Banja
Buatan tukang Reno Ali,

Buatan tukang Sungai Pua

Elok carano bukan kapalang, Carano bak tiuang ka tabang
Baukia bamego-mego,

Batata bapucuak rabuang
Panuah barisi kalangkapan,

Limo bak bilangan jari
Kaganti baso jo basi,

Iyolah ajaran Adat basandi Syarak

Apolah jinih kalangkapan,

Partamo sadah kaduo sirieh
Katigo pinang kaampek Gambia, Kalimo timbakau

Larang kapado nan sadahnyo, Sadahnyo langkitang gadang
Dibasuah jo ayie ambun,

Babasuah jo pati santan
Dihambuih jo lingka Cino,

Dikipeh jo ambi-ambi
Putiah nan bak banak dalam, Dipalik jo jari manih
Bakisa ka jari tangah,

Mambayang ka tapak tangan
Usah ka usak makin panuah,

Itulah kato bakiasan
Tanamo urang Minangkabau, Manyambah Tuhan nan Aso
Sumbayang limo wakatu,

Adat basandi syarak
Syarak basandi Kitabullah,

Syarak mangato adat mamakai.
Lorong kapado nan siriehnyo, Kiasan takanduang di dalamnyo
Adat bagaua dalam hiduik, Mamakai budi nan baiak
Siriehnya udang tampak hari, Sirieh timbalan kuku balam
Gagangnyo bapantang putuih, Buahnyo diambiak ka tinaman
Daun diambiak ka kusuak mandi, Usah ka ratak rintiah tido
Usah ka layua makin hiduik,

Itulah budi dengan malu
Nan tuo di hormati,

Nan ketek dikasihi
Samo gadang bawok bakawan,

Nan gadang jan malendo
Nan panjang jan malindih.

Lorong kapado nan pinangnyo, Pinang batuntuk jo baruntun
Bak bawang dibalah duo,

Bak dusun dibalah ampek
Kiasan takanduang di dalamnyo, Salamo hiduik di dunia
Barek samo dipikua,

Ringan samo dijinjiang
Saciok umpamo ayam,

Sadanciang ibarat basi
Sakato lahia jo batin,

Sasuai muluik jo hati
Iyo sakabek nan bak lidih,

Nyato sarumpun nan bak sarai
Iyo salubang nan bak tabu,

Elok saikek nan bak sirieh.

Lorong kapado nan gambianyo, kaba barito kami danga
Buatan Puti Sarilamak,

Sapipiah jatuah ka sirieh
Mambayang sampai ka muko, Sirahnyo tampak di bibia
Lamaknyo tingga di rangkuangan, Parisonyo maruang tubuah
Sehat anggota katujuahnyo
Kato bakieh baibarat,

Kiasan takanduang di dalamnyo
Duduak sorang basampik-sampik, Duduak basamo-samo balapang-lapang
Kato surang dibulati,

Kato basamo dipaiyokan
Dibulekkan ayie ka pambuluah, Dibulekkan kato ka mupakat
Bulek baru di golekkan,

Pipiah baru dilayangkan
Bulek jan basuduik,

picak jan basandiang
Data bak lantai papan,

Licin bak dindiang camin
Tapauik makanan lantak, Takuruang makanan kunci.

Lorong kapado nan santonyo, Huluih saiknyo dek maracik
Banamo timbakau Jawo,

Racik tukang dari Piobang
Saheto panjang jaluanyo,

Harum satahun pajalanan
Kiasan takanduang di dalamnyo, Adat hiduik di Minangkabau
Jauah jalang manjalang,

Dakek cinto mancinto

Kok rusuah iyo bapujuak, Tagamang nyato bajawek
Hanyuik patuik dipintesi, Tarapuang nyato bakaik
Kok condong iyo batungkek,
Lamah makanan tueh,

Nan panjang makanan Karek,
Nan singkek makanan uleh,

Nan ado samo dimakan
Nan indak samo dicari,

Mandapek samo balabo, Kahilangan samo marugi.

Hati gajah samo dilapah,

Hati tungau samo dilapeh
Kok kurang tukuak manukuak, Senteng bilai mambilai
Malangkah di ujuang karih,

Basilek di pangka padang
Kato adat salalu baumpamo, Rundiang salalu bakiasan
Didalam adat nyato basuo, Papatah patitih mangatokan
Pituah kato pusako,

Pusako ninik mayang nan dahulu
Gulamo mudiak ka hulu, Mati disemba ikan tilan
Kanailah anak bada balang,

Pusako ninik mamak nan dahulu
Kini manjadi undang-undang.

Manolah Sutan janyo hambo
Dek alua manantang bana,

Dek luruih tujuan kato
Ibarat saluang pauleh angok, Titian ayie polongan asok
Dari ninik dengan mamak,

Sipokok alek namonyo kato
Nan sakarang kini nangko,

Nak sampai niat jo mukasuik

Ujuik paham nan nyo jaleh,

Sadang kutiko bungo kambang
Sirieh sahalai nak bacabiak,

Pinang sabuah nak bagatok
Gambia sabuah nak bapipia,

Sadah di cupu nan bapalik
Rokok sabatang iyo baisok,

Sirieh sakapua rang namokan

Tanam sirieh tanamlah pinang, Tanam karakok di halaman
cabiak sirieh gatoklah pinang, Giliang rokok pamenan tangan

Itulah jinih sambah kami,

Sambah alah salam lah tibo
Kato bana sungguah di bari, Harapan kami nan basamo

Barabah sadundun dengan balam, Sikok barulang pai mandi
Sambah sadundun dengan salam, Kato dimintak babunisi

Sakian sambah pado nan banyak.

by.(ikkmduri)

Diposkan oleh LA CHOGA di 02.00

Bagian VI

Pasambahan Siriah

ferdymp.blogspot.com/

Imbau :

Sungguah surang jo baduo ambo imbau

sifaiknyo sagalo dunsanak nan datang tadi, manuruik pasa nan biaso kato biaso di banakan rundiang biaso di puhunkan yo puhun parundiangan dakek sutan/sidi.

Jawab :

Dakek ambo, insyaallah.

Imbau :

Karano ado bana nan taraso andak manampuah jalan luruih manyabuik kato nan bana, akan tetapi sabalun kato di sabuik rundiangan di anta  sampai, karano barundiang diateh medan manyilih didapan angku niniak mamak imam katik sanak jo sudaro sifaiknyo sagalo dunsanak nan datang tadi

Manuruik sandaknyo iyo tabaoan taratik jo manyilih lelo jo korenah ta angkek an tangan nan duo basusun jari nan sapuluah di unjaman lutuik nan duo di takuan kapalo nan satu sambah dinamoan, sabah lalu kato di baco iyo baitu kato nan sarancaknyo. Baa dek ambo kok marabuik pantangan nan kacaba bakandak pantangan nan ka buliah, indak sarato tujuan nan baangkek jari nan basusun malahan kato nan bana ka dibaco jalan nan luruih kaditampuah sambah nan tuo samo kito pamulio sakian rundiangan dianta sampai.

Jawab :

Kato lah tibo rundingan di bagindo dakek ambo sungguah dakek ambo sifaiknyo sagalo kami dunsanak nan datang tadi, baa nan dek ambo manuruik pasan nan biaso tuga taasak baarah tibo kato di lapeh di sauik i, kato surang dapek bulek dek kami ado surang baduo jo batigo janji jo istirahat nan bapintak mufakaik ambo dulu mananti bagindo jo panitahan.

Imbau :

Baa kato sutan tadi, mancari kato jo mufakaik ambo mananti jo panitahan, elok bunyi gandang batingkah, samanih kato ditarik jo mufakaik baa pulo ndak kabuliah baluangan tantang tu

Jawab:

Iyo lah talambek ambo ateh manjawab kato mangumbalikan parundingan bagindo tadi karano ambo mancari kato jo mufakaik manggiliang kato jo paramuan, lah bulek lah buliah di golongan picak lah buliah dilayangkan, tapi diateh kato kato nan lah putuih dek kami bulek aia kapambuluah padu kato jo mufakaik.

Ateh kamanjawab kato mangumbalikan parundingan kito tadi. Iyo tapulang kadakek ambo, baa kolah lai lah tajadi?

Imbau :

Iyolah talambek sutan ateh jawab kato mangumbalikan parundingan ambo tadi dek karano sutan mancari kato jo mufakaik manggiliang kato jo paramuan baa kini lah dapek kato nan samofakaik sutan juo nan ka mangumbalikan parundingan ambo kan iyo baitu sutan ? ndak dek ambo pucuak dicinto ulampun tibo sumua dikali aia tabik lah pamatang gadang nan balambak e lah sarancak e bana tu nyo

Jawab :

Alah nan manjadi parundiangan gindo tadi karano ado bana nan taraso manampuah jalan nan luruih manyabuik kato nan bana tabik adaik bakarilahan, ratak pusako karano pabuatan, kok ado kato nan bana kadibaco jalan lurui kaditampuah baluangan jalan bakek lalu, bakanak an janjang bakek naik, bacolah bia kami danga an.

Imbau :

Alah jadi isi rundingan silang bapangka karajo nan bapokok arak jo jariah nan lah lapeh paluah didado nan lah suruik rokok sabatang nan lah anguih, kecek mangecek alah pulo, arak lapeh kiro-kiro tumbuah arak lapeh dek sagalo dunsanak nan datang, kiro-kiro tumbuah dek silang bapangka karajo nan bapokok, ko kaganti siriah kagagangnyo, ko pinang katampuaknyo lalu disusun diatakan ka dalam carano dilingka jo arai pinang ditadah jo pinggan putiah di saok jo aleh lamak, siriah dilengkapi jo saalaiknyo carano di tangah di katapian di pinjek lalu di tatiang diatakan ka tangah-tangah di hadapan angku niniak mamak imam katib, sifaiknyo sarato dunsanak kami nan datang tadi. Itulah kami andak malaluan parmintaan, siriah di cabiak pinang di gatok sadah di palik santo di jujuik lalu di makan samasak e sakian rundiangan di anta sampai

Jawab :

Dek karano abih-abih baangkuik rimbun batutuah, lah baasak ladang baaliah baniah tadi tantangan sifaik parundingang kato alah bajawab parundiangan alah bakumbalian, baa kni lah siriah pulu nan gindo kabaan, baa nan dek ambo kok baiyo ndak sadang sakali kok bajalan ndak sadang salangkah kok mangabek ndak sakali arek mamancuang ndak sakali putuih kok kandak ka dibari pintak kadipalakuan, kato ambo tariak jo mufakaik mananti gindo sakatiko

Imbau :

Baa nan kato sutan tadi baasak ladang baaliah baniah kok tadi sifaik parundiangan kato bajawab rundiangan lah bakumbalian kandak lah babari. Baa kini siriah nan kami idangan baa ruponyo dek sutan kok kandak ka dibari pintak kadipalakuan , kato di elo jo mufakaik iyo baitu? Baluanga tantang tu, bakarantian awak dulu

Jawab :

Tempo diawa tadi parundiangan gindo balatakan dalam sitinah ………… dalam siraik karano ambo mancari kato jo mufakaik manggiliang jo paramuan, dek gindo lah mananti baa dek ambo lah bapa iyo an, sapanjang paiyoan ambo tadi bulek aia kapambuluah padu kato jo mufakaik babelok-belok kabau di kandang suruiknyo ka balero juo  kok acok bana kato dari surang kanan surang limpahannyo kabadan diri ambo juo, panjawek kato pangumbalikan parundiangan tadi kabaa kolah lai lah kajadi.

Imbau :

Baa kato sutan tadi rundiangan ambo ba atakan dalam sitinah karano sutan mancari kato jo mufakaik manggiliang kato jo paramuan, baa kini ateh manjawab kato mangumbalikan parundiangan ambo tadi kan iyo baitu? Kandak lai kababari pintak lai kabalakuan siriah ambo lai kamasak barang tabik nan bak padi barang tumbuah nan bak bijo di ma tarabik e batarimo sajo

Jawab :

Sabalun kato bajawab rundiangan bakumbalian cameh ambo tantangan nan ka anyuik, tagamang tantangan nan kajatuah, setia manjalani untuang manyudahi, satantang rundiangan nan gindo anta sampai tadi, elok ririknyo nan bak jaguang elok susunnyo nan bak piriang, elok sikeknyo nan bak pisang, baa nan dek ambo kok indak tatitih nan bak batang tatikam nan bak jajak, nan tingga rila jo maaf nan di pintak

Imbau :

Aa lah nan marusuah mangaya dek sutan kini, tantangan rundiangan nan ambo anta sampai tadi. Kok indak tatitih bak batang tatikam jajak dek sutan, indak doh dek ambo kini bago saketek lai sadang malah lai cukuik sabilangan baa pulo ndak ka jadi.

Jawab :

Aa lah nan manjadi rundiangan gindo tadi, tantangan siriah kelangan kandak di silang nan bapangka, siriah dicabiak pinang di gatok gambia di pipiu sadah di palik santo di jujuik dimakan samasak-masak nyo kan yo baitu.

Imbau :

Kok kandak lai raso kadibari pintak lai dipalakuan adapun siriah masak duo, partamo masak dimakan nan kadou masak jo mufakaik kok salah satu tabokan dek kami baa ko dek pangka.

Jawab :

Adapun masak siriah duo maralah, partamo masak dimakan kadou masak jo mufakaik kan iyo baitu. Ndak doh dek kami kandak lai kababari siriah kami lai kamasak batarimo suko istirahat sakatiko

Lah baegangan kiri jo kanan ilia jo mudiak dapek kato nan sasuai, kok nama nan baradaik makan siriah manjambo ka carano nama nan indak jo mufakaik lah masak siriah gindo

Imbau :

Kandak alah babari pintak lah balaku siriah kami lah masak, sanang dalam hati sajuak kiro-kiro bakarantian kito dulu.    

Bagian VII

Pidato Pasambahan

( Pidato Siriah )

Dari : baguci.blogspot.com

Ujuang : Maa baliau, datuak, ....

Pangka : Sampaikan lah Datuak, ...

Ujuang :
Ikomah sambah nan ka dipulangkan ka bakeh Datuak, adek bajalan babuah batih, adek malenggang babuah tangan.

Dek lai tasuo nan bak kian, mamintak kami ka bakeh silang nan bapangka, karajo baiek nan bapokok, naikkan janang ka tangah, mah Datuak ..

Pangka :
Lah ukue sampai, Datuak ....

Ujuang :
Bilang sakiro itu lah, Datuak

Pangka :
Jikok baitu pintak jo pinto, pintak bulieh, kandak balaku. Namun samantang pun baitu, basaba juo Datuak samantaro, tarago janang marenjek saruang, mah Datuak ...

Ujuang :
Basaba kami mananti, mah Datuak.....

.... janang tagak manjapuik carano dari ujuang, kemudian dilatakkan di muko ninik mamak rang sipangka...

Ujuang :
Maa baliau, Datuak, ....

Pangka :
Sampaikan lah Datuak, ...

Ujuang :
Ikomah sambah nan ka dipulangkan ka bakeh Datuak,

pitaruah indak baunyian,

pasan indak baturuti.

Satantang pakiriman kami nan talayang,

lah sampai kolah ka haribaan Datuak, mah Datuak ....

Pangka :
Sabarih pakiriman Datuak nan talayang, lah mawujuik lah barupo, mah Datuak ...

Ujuang :
Maa baliau, Datuak, ....

Pangka :
Manitah lah Datuak, ...

Ujuang :
Itumah sambah nan ka dipulangkan ka bakeh Datuak, sungguh pun Datuak surang nan dihadang dengan sambah, tagah dek adaik jo limbago, dek aluran datuak kasamonyo, ambo ka mandatangkan sambah.

Apolah ruponyo jinih pasambahan nan ka ambo pulangkan ka bakeh Datuak, dek curiang barih dahulu, dek andai pusako lamo, jikok basiang di nan tumbueh, jikok batimbang di nan ado, tumbuah sarupo iko kini. Dek lamo lupo kok datang, dek banyak ragu kok tibo, nan tinggi kok kurang anjuang, nan gadang kok kurang amba, Allah nan basipaik Qodim, manusia basipaik khilaf. rila jo maaf ambo puhunkan. Limbak nan dari pado itu, adaik kan duo salanggano, cancang nan duo salandasan.

Putiang talatak di hulu
Di bawah kumpalan tali
Asa mulo rundiang dahulu
Tigo limbago nan tajadi

Partamo sambah manyambah, kaduo baso jo basi, katigo sirieh jo pinang.

Sambah manyambah dalam adaik, tali batali undang undang. Tasabuik bamuluik manih, takato baso jo basi, muluik manih pangarang baso, budi baiek tali pikatan, pahubuang silaturrahmi, banamo adaik sopan santun. Rajo alam di Minangkabau, pamuncak di limo puluah, iyo carano rang namokan.

Ramo-ramo tabang malayang
Malayok ka koto tangah
Banyaknyo ampek pulueh ampek
Endah carano bukan kapalang
Talatak di tangah-tangah
Di lingkuang urang nan rapek

Carano banamo carano basa, baukie bamego-mego, batatah bak pucuak rabuang, buatan Sariak Sungaipua. Batirai ba antiang-antiang, ba aleh kusap kain ramin, panuah barisi kalangkapan, kaganti baso jo basi.

 Loroang kapado siriahnyo, siriah nan kuniang merah janggi. siriah tajali tampuak udang, dimakan sahalai manih, buahnyo jarang basuo, batang diambiek ka tinaman, satahun dalam gulungan, usah ka busuak layuapun tido.

Limbak kapado pinangnyo, pinang baruntuak jo baruntun. Bak dasun dibalah duo, bak bawang dibalah ampek. Batangnyo tinggi linggayuran, satahun tupai mamanjek. balun lai sampai ka puncaknyo. Tingginyo jambo-jamboan, buahnyo jangkau-jangkauan, jatuah ka bawah jadi ambun, banamo si Ambun Suri.

Loroang kapado gambianyo, kaba barito kami danga, buatan puti sari lamak, sapipia jatuah ka siriah, mambayang sampai ka muko, lamaknyo tingga di rangkungan, sarinyo naiak ka paroman, sirahnyo nampak di bibia.

Sadahnyo langkitang gadang, di basuah jo aie ambun, bacampua jo pati santan, diambuih jo lingka cino, dikipeh jo ambi-ambi, putiah nan bagai banak balam. Dipalik jo jari manih, bakisa ka jari tangah, mambayang ka tapak tangan. Timbakaunyo aluih bak randau batang padi, diracik nak rang Piobang. Di Ranah Luak Limo Puluah, bapantang masiek di paneh, masiak satangkai aie bungo.

Ramo-ramo di tangah koto
Lipek batindieh bungo nango
Pitalah rami lah pakan
Patah subang patahlah saluik
Datuak sarato nan bak tuo di siko
Liek lah sirieh dalam carano
Dayang panginang mahasiekan
Antah nyo kurang antah lai cukuik

Pituah juo ambo ka dibari barang sapatah, mah Datuak ....

Pangka :
Bana pulo tumah sapanjang panitahan Datuak nan ka tangah,

Rajo indaruang nak ka bayang
Nak lalu ka indropuro
Kudo balang kaniangnyo putieh
Tapawik cando di halaman
Langkok kakang jo palanonyo
Satatang pangiriman dayang panginang
Lah ambo liek dalam carano
Sirieh kuniang pinangnyo putih
Gambie nan elok kapamenan
Sadonyo lah cukuik asie balako, mah Datuak .....

Ujuang :
Lah ukue sampai Datuak .....

Pangka :
Bilang sakiro itu lah Datuak ....

Ujuang :
Dang dikatokan lah cukuik asie balako, disinan kan takana pulo ambo dek pitua urang tuo kito, apolah nan manjadi pitua dek urang tuo kito

Ayam putieh tabang batali
Di lurah mangko maraok
Batalue di rumpun sariek
Anaknyo turun salapan
Makan lah sirieh pinang kami
Bapitua mangko basingkok
Baibarek mangko dicabiek
Batangnyo ambiek ka tinaman

Tanam sirieh tanam lah pinang
Tanam karakok di halaman
Makan sirieh gatok lah pinang
Baitu pitua sapangkalan,

mak Datuak .....

Pangka :
Lah ukue sampai, Datuak....

Ujuang :
Bilang sakiro itulah, Datuak....

Pangka :
Bana pulo tumah panitahan tuan nan ka tangah, jikok didanga lah elok bunyi, jikok dipandang lah rancak rupo. Satantang pintak jo pinto Datuak tadi, pintak buliah kandak balaku.

Gadang lah aie muaropaneh
Bapenong lalu ka muaro
Ka pakan mambali sadah
Dibawo anak urang kampuang Dilam
Lah mandanguang carano ameh
Lah mandanciang palapah nan pusako
galak tasengeang kapuran sadah
Tandonyo siriah lah kami makan

alah kasanang hati Datuak, mah Datuak .

Ujuang :
Iyo lah baiek manyanang hati kami, mah Datuak....
Bersambung ...

Note :
Pidato pasambahan Manjapuik marapulai, disusun oleh kawan-kawan di "Kacimpuang pamenan Mandi" di bawah arahan Halvi Hamid Mangkoto Sati, yang anggotanyo terdiri dari anak Nagari Muaropaneh Kabupaten Solok nan ado di Jakarta dan sekitarnyo.

Naskah ini telah beberapa kali dikaoan (dipraktekkan) dalam acara manjapuik marapaulai manjalang baralek di gedung atau di aula. Diharapkan naskah ini dapat membantu memberikan arah dalam acara pidato pasambahan.

Semoga bermanfaat.

sumber:http://www.cimbuak.net

Bagian VIII

PASAMBAHAN SIRIAH

Dari : mukokantua.blogspot.com

AMPUN AMPUN, ampun ampun, ampun baribu kali ampun.
Ampun kapado niniek mamak nan gadang basa batuah, iyolah urang nan ampek jinih di nagari, pangulu nan saandiko, manti nan sasipek, malin nan sakitek, dubalang nan sadorek, sarato urang tuo-tuo, alim ulamo jo cadiek pandai, suluah bendang dalam nagari.

Sungguahpun nan bak itu, sambah nan indak balupokan, kapado nan duduak sahamparan, nan baselo bajabektan, nan salangkah didaulukan, nan sarantiang ditinggikan.
Lalu pulo ka nan basamo, nan langkok papek kasadonyo, kok gadang indak kadisabuik gala, kok kaciek indak kadisabuik namo, aluran mande sayo pamande, aluran bapak sayo pabapak, aluran kakak sayo pakakak, nan kaciek sayo paradiek, samo gadang lawan baiyo, rila jo mooh sayo pinto.

Adopun sambah nan kan sayo pasambahkan,

 bak pitua datuak-datuak juo :
Carano bari batagak banamo patah sambilan
Kaba Pusako sayo bukak,

rila jo maoh dipintokan.

Sayo malompek nak basitumpu,
mamancang nak basangkalan,
manyaik nak bapamagangan.
Usahlah sayo bak mamungkang balam dalam rambun,

pauah tumbuah di lambah,
buli-buli sangkuiktan puan
sayo datang manyampaikan sambah
di bawah duli mangkuto tuan.

Dibao anak puto-puto, dibao anak sutan-sutan, dibao anak rajo-rajo,
di dalam nagari nan ampek suku.
Dilegakan carano nan ampek, nan duo lalu pado tuan nan ciek latak di tangah
nan ciek tingga dek kami, itulah nan ka untuak niniek muyang.
Adopun carano nantun, lai batirai baantiang-antiang, lai batatah paramato, buektan Singkarak jo Sulik Aie.

Adopun carano nantun, lai barisi salangkoknyo, sirieh udang tampa hari, tampuaknyo manguku balam, buahnyo jarang basuo, batang diambiek ka tinaman,
sabulan dalam pangguluangan, usahkan busuak batambah iduik.

Kok dietong pado pinangnyo, batutuik pinang batutuah, bak dasun dibalah duo, bak bawang dibalah ampek, tumbuah di lereang pasagian.

Urek nan lalu ka sarugo, jelo bajelo di tapian, tingginyo jangkau-jangkauan,
sataun tupai mamanjek, tigo bulan salodang jatuah, baanyo kito mamanjeknyo.

Lai bapanggie ungko jo siamang, mintak izin ka ureknyo, paambiek sado nan paguno, paguno dek kito nan basamo.

Kok dietong pado gambienyo, gambie nan dari Sarilamak, buektan anak Indojati, tuangan ameh jo timbago.

Kok dietong pado sadahnyo, sadah putieh langkitang lawik, dikisa jo pati santan, dituhuak jo aie bungo, sakadam sakati limo.

Kok pandai mamalik sadah, dipalik jo ujuang tunjuak, dikisa jo jari manih, kok tak pandai mamalik sadah, tapalik sakadamnyo.

Durian Siulak baliek,
buahnyo jatuah babelok,
sahariko danak nan baiek,
samalamko kutiko nan elok.

Sirieh baikek jo janji, janji baikek jo buektan.

Tipak nan dari pado itu, saparati sirieh nan sacabiek, pinang nan sagatok, sadah nan sapalik, dek awa kato nan sapatah, tagak dek imbau nan sabuah,
sambah tajelo pek nan rapek , tatabua di tangah-tangah.

Sambah nan kan sayo sambahkan, tumbuah sarupo iko kini,
utang dek diri sipangkalan, iyo dek badan diri sayo,
taniek di dalam hati, tangiang-ngiang dipikiran, siang manjadi angan-angan,
malam manjadi buah mimpi.
Adopun nan dipasambahkan, tanun batanam aka budi, sulam sari Minangkabau,
kaba pusako muyang kito, iyolah Kaba Tareh nan disambahkan.

Adopun Kaba Tareh, Kaba Pusako Minangkabau, ado ampek parakaro :

Nan partamo Tareh Batang
nan kaduo Tareh Daulu
nan katigo Tareh Kudian
nan kaampek Tareh Runuik.

Adopun nan dikatokan Tareh Batang
partamo Kaba Datuak Dingalau
kaduo Kaba Sariputi
katigo Kaba Ruhun Jani
kaampek Kaba Datuak Cati.

Tipak kapado Tareh Daulu
partamo Kaba Parapatieh
kaduo Kaba Indojali
katigo Kaba Talago Undang
kaampek Kaba Taruih Mato.

Sauak kapado Tareh Kudian,
partamo Kaba Bukik Siguntang-guntang
kaduo Kaba Ameh Urai
katigo Kaba Batang Hari
kaampek Kaba Indang Bumi.

Nan disabuik Tareh Runuik,
partamo Kaba Cindua Mato
kaduo Kaba Sibaribuik
katigo Kaba Anggun Nan Tungga
kaampek Kaba Gombang Patuanan.

Tipak di danak sahariko, iyo kutiko di malamko,
kaba tareh dilewakan, iyo kapado nan basamo,
bak kato urang tuo-tuo, adaik limbago di galanggang, pakai janang jo juaro.
Namun samantangpun bak itu, tipak ka badan diri sayo, silang nan bapangka, karakok nan bajunjuang, karajo nan bapokok, umua baru sataun jaguang, darah baru satampuak pinang, pandapek alun sabarapo,
maoh jo ampun sayo pinto.

Kok basuo jalan basimpang, caliek tampuah kasadonyo bulieh tau bateh inggannyo.
Bak pitua datuak datuak datuak juo, kok sasek di ujuang jalan, capek kumbali ka pangka jalan, kok sasek di rimbo gadang, capek panjek kayu nan tenggi, tapi kok sasek di gurun nana, takuakan badan sakutiko, kana diri kanalah badan, siapo badan diri nangko.

Jikok ado siapo madokan, jikok duduak siapo manduduakkan, jikok tagak siapo managakkan, alam tardiri Tuhan mambari, dunsanak nan capek maranuangkan, ka langik sanak gantuang tinggi, ka bumi sanak kalikan dalam.

Jikok alah nan bak kian, manyarah kito pado Allah, tagaklah capek basugiro, turuik kamano ampu kaki, kok lai untuang takadie Allah,
kito basuo jo batehnyo.

EMRAL DJAMAL DT. RAJO MUDO
+6281266014270

Bagian IX

Ba Sialua ( pasambahan siriah)

Dari : www.pincuranbonjo.com

Posted by pincuranbonjo

On October - 11 - 2010

Ma lah Datuak

Sungguahpun Datuak duo tigo nan taimbau, ambo kan mandatangkan sambah.

Adopun sambah nan ka ditunggang pado Datuak, pihak dimalam iko kini dek sariat jo hakikat niniak jo mamak sarato ibu jo bapo sarato pucuak bulek urek  tungga tunggang sarato ka ampek suku tinggi nan dianjuang gadang nan diamba ambo kan mandatangkan sambah.

Kali lawa dipulau rimbang anak ruso mati di tadabiah, kok gawa buliah ditimbang kok salah mamintak maaf ambo na  labiah pado Datuak karapatan.

Karakok ditanah data siriah di gunuang marapi diambiak anak rang pariaman, ambo kan mandatangkan sambah dari tangah masuak ka tapi lalu ka jorong ka halaman

kapuak iyo kapuran iyo patah dimano tatimponyo. Datuak iyo mamakpun iyo sambah dimano katibonyo

alah dek adat jo pusako dek barih cupak jo gantang dialua Datuak kasamonyo. Sambah baririk dinan rami salam tatunggang dinan banyak salingkuang adat jo pusako, tinggi katian tampuak naraco Pucuak undang dalam nagari. Tinggi cupak dalam kampuang, andiko dalam adat. Mukasuik indak bainggo salam nan indak babateh, kapado Datuak karapatan. Nan mudo palawan dunie nan cadiak palawan andai, hulubalang pagawai adat. Adat tuo panahan ragam, panghulu janang tatap, mulonyo rundiang kadi sabuk samo picayo pado Allah, samo bangantuang pado Nabi, Allah ta’ala kayo sungguah. nabi Muhammad rasulnyo tuhan panghulu kito sakalian alam. Iyo warih nan indak buliah hilang alua nan indak buliah putuh. Satitiak bapantang ilang sabarih bapantang lupo dek umanat nan bapacik dek kalipah nan baganggam nan kato iyo baitu dek cupak talago panuah, dek gantang simarajo lelo nyato pusako kito juo dilingkuang adat nan salapan alah dek buek kato daulu.

Takalo maso daulu samusim maso saisuak nan tasabuk-sabuk juo asa mulo rajo daulu banamo Zulkarnaini nan turun dari awang gumawang. Limpahan anak nan batigo partamo simarajo Alif nan turun ka banua ruhum, Kaduo simarajo depang man turun ka banua cino nan katigo simarajo dirajo nan turun ka pulau ameh nanko, hilang dilawik timbua didarek ado pitatah maso itu,

dimano titiak palito dibaliak telong nan batali, dimano turun niniak kito, eten dipuncak gunuang marapi.

Basentak turun kabawah tibo diampang guguak dilinggundi nan baselo dibuek balabuhan balimbago diam dikampuang Pariangan Padang Panjang lalu karanah minang kabau banamo dusun tuo balimo kaum disanan nan batabek basawah tangah, buatan niniak kito Datuak. Tantejo burhan nik kulah namo induak beok bapaknyo, kok maatok sambia duduak, kok manurang sambia tagak,

sawah gadang satampang baniah makanan urang tigo luhak itu warih nan dijawek, itu tutua nan didanga nan tasabuik-sabuik juo ujuang labuah tanjuang sungaiyang duo baleh kaum disanan babasa ba ampek balai nan barajo badaulat baru alam gunuang pasisia nan sainggo pintu rajo, hilia badatuak mudiak batuan, tuan kadi dipadang gantiang andomo disuruaso titah disungai tarab, rajo basa di Pagaruyuang itulah rang nan mamarentah kadalam luak nan tigo, ka lareh nan duo, partamo luak tanah data, nan kaduo luak lubuk agam nan saingo lado sulah mudiak, sainggo dusun tungga ilia, sampai kinali ka manggopoh, aianyo karuah ikannyo lia, salilik gunuang marapi, salingkuang gunuang singgalang jatuah ka luak lubuak agam. Nan ka tigo luak limo puluah, ainyo janiah ikannyo jinak, sainggo sipisak pisau anyuik, sialang balantak basi sahinggo silukah pinang tungga, jatuah kaluak limo puluah. Luak dibagi tigo, partamo luak, kaduo lareh, katigo ranah. Nan dikatokan luak suayan sungai balantiak, sarik laweh tambun ijuak, koto tangah batu hampa, daruian gadang, babai, koto tinggi, ai tabik, sungai kamuyang, situjuah banda dalam, limbubakan, padang karambia, aua kuniang jo sicincin tiaka jo payobasuang, mungo jo andaleh taram jo bukik limbuku, batu balang jo koto nan gadang, itulah nan masuak luak. Nan dikatokan lareh; gunung babai koto tinggi baliang pitopan, surau, labuah gunuang, sitanang muaro lakin, gaduk tabiang tinggi, halaban jo ampalu. Nan dikatokan ranah; gantiang koto laweh, suliki jo sungai rimbang, tiaka balain mansiro, talago balai talang jo balai kubang, taeh simalanggang, piobang sungai baringin, gurun, lubuak batingkok, tarantang, sarilamak, arau jo solok, taruh ka padang laweh. Nan dikatokan lareh nan panjang, taram hilirnyo, pauh tinggi mudiak sampai taram. Nan dikatokan lareh nan bunta sahinggo simalanggang hilia, taram mudiaknyo sampai ka simalanggang, nan dikatokan lareh batang sinama; sahinggo simalanggang mudiak ka tabiang tinggi ka mungkaa hilia.

Dihulu tungku nan tigo ditangah kampar sambilan, diulak koto nan anam nan dinamokan tungku nan tigo; limbanang koto laweh koto tangah, koto tinggi, sungai dadok, sungai naniang. Nan dinamokan kampa sambilan; tanjuang, muaro takus, gunung malelo pongkai, koto bangun, sialang daruyan tinggi, kapuak lubuak alai. Diulak koto nan anam, koto baru, koto alam, tanjuang pauah, tanjuang balik, manggilang, gunuang malintang. Nan dikatokan kampar kiri anam nagarinyo, ujuang bukik, ludai, gunuang sailan, lipek kain, kuntu jo songgan. Urek digauik tabiang tinggi, pangka dipangkalan pucuak malepai ka gunuang sailan, mandaga ka pulau ruhum, ta cewang ka pulau paco, tagarumun gunuang bonsu, tagak alih gunuang sago, atok tungku gunuang singgalang badirilah alam minang kabau. Luak jo lareh jadi sasi, lah ta antak puntiang ka ulu ka tangga raso tak mungkin antah ko Allah manggarakkan, cupak jo gantang nan bataraju, nan kato iyo baitu kito pulangkan pado Allah.

Lai nan ta kilan nan takolang pado hati nan tarigi pado mato nan bak kuku diujuang jari nan taraso-raso juo pihak dimalam iko kini kok alek lah limbago jamu lah tibo, kok alek lah sapanuah rumah, kok jamu lah sapanuah kampuang lah panuah runggo hati Datuak lah santoso ibu jo bapo lah sanang bana hati kami. Tandonyo tuah japuk lah tabao tuah anta lah sampai, lah naiak tango nan limo lah bapijak ditapakan gadiangl ah tagantuang ditupang pintu, lah lalu ka labuah kudo lah baririk diruang tapi, lah basusun diruang tangah. Limbak nan dari pado itu alah tantangan di duduak Datuak nan ba banja di tagak nan babandiang kok tidak tibo ditampeknyo nan diujuang kok ka pangka, coreng dilua kok ka dalam kok baliku di nan kalam kok talinduang pek nan banyak ampun jo maaf ambo mintak izin jo rela dari Datuak habih cupak palilisan habih adat dek karelaan cupak panuah gantang bubuang nan kato nyo baitu lah talantak puntiang ka ulu dibawah kiliran taji asamulo kato daulu tigo limbago nan tajoli, partamo sambah manyambah kaduo baso jo basi, katigo siriah jo pinang. Sambah manyambah dalam adat tali batali undang-undang tasabuk dek undang bida kito. Muluik manih calempong kato baso baiak gulo dibibia. Didalam cupak nan piawai dek janji kato mufakat dek luruih tak dapek tidak, namun adat ba pakai juo bamain ereng jo gendeang batimbang baso jo basi di dalam adat nan ba pakai  banamo adat sopan santun. Panuruk  alua nan tigo tu taga dek alek basipangkalan. Talayang carano ka tangah nan ta unjuak kamuko datuak kasamonyo. Carano banamo carano basah congkak bak tiuang ka tabang elok ba anggang ka inggok buatan puti sari andam baukia bapucuak rabuang, batatak ba bego-bego ba aleh jo kasua rumin, barisi siriah jo pinang siriah datang menghadap pinang datang manyambah, manuntuk adat jo pusako siriah sacabiak nak bakunyah pinang sadidiah nak bagatok rokok sabatang nak bageleng. Itunyo sambah nan dilalukan diharap kato nak batarimo aso panjang duo singkek harapan kato nak kembali sakian sajo pasambahannyo.

Jawaban Siriah Pinang

Lah sampai dek datuak

Jalannyo nan  sapanjang kato datuak nan mandatang, nan talimpah pado kami baiak buni lah didanga, elok rupo lah diliek, luruh gayuang patuk disambuk, elok kato bana dijawab. Warih nan indak buliah ilang, pusako nan dari niniak moyang, sajak daulu sampai kini eten diranah pariangan padang panjang nan babalai saruang nan batunggak tareh jibatang nan baporan aka lundang nan batabuah puluk-puluk, nan baragang jangek tumo itulah balai na usali sajak dulu sampai kjni, namun ba atolah tukini kato bona manahan sudi hukum adil manahan bandiang, dan kato iyo baitu kato dibawo baukua bana dicari sampai dapek, baiko buliah nan baitu, adokoh adat pisakonyo nak buni juo dari datuak.

Ma lah datuak tadi

Jalannyo nan sapanjang kato datuak nan talimpah pado kami iyolah kato nan sabananyo, nak rintiak ragi lah tibo nak licin kilek lah datang, kato dibawo baukuran rundiang dilatak kalimbago, lah tapakai lalai jo lambek ampun jo maaf, ambo mamintak izin jo rela dari datuak. Dan kato iyo baitu, warih nan indak buliah ilang pisako nan dari niniak moyang bapakai juo sampai kini. Takalo maso daulu, samusim maso saisuak, nan tasabuik-sabuik juo asa mulo Rajo daulu banamo Zulkarnaini nan turun dari awang gumawang, limpahan anak nan batigo, partamo simarajo alif, kaduo simarajo depang, katigo simarajo dirajo nan turun kapulau ameh nanko,  kapa lilito daulunyo, panjang nan tangah tigo dapo lauik sajo daulunyo, kini manjadi pulau paco, pulau paco daulunyo, kini manjadi alam minangkabau.
Ilang dilauik timbua didarek, ado pitatah maso itu, dima disalai palito dibaliak talang nan baduri, dimano turun niniak kito, eten dipuncak gunuang marapi. Basentak turun kabawah, tibo diampang guguak dilinggundi nan baselo dibuek labuan satimbago disirangkak itam kuku dibuayo putiah daguak diam dikampuang pariangan padang panjang ilia ka indra giri singgah samalam ka ladang panjang, mulo adat kabadiri diparingan padang panjang. Pisang  sikalek-kalek utan, pisang tambatu nan bagatah, Bodi caniago imyo bukan . Koto pilang nyo antah. Tajadi lareh nan duo disasikan luhak na  tigo, 1. Luhak tanah data, 2. Luhak agam, 3. Luhak 50. Aiknyo janiah sayaknyo landai, ikannyo jinak sainggo. Sisawik sungai rimbang, sainggo sipisak pisau anyuik, sainggo silukah pinang tungga sainggo durian ditakuak rajo saingo sialang balantak basi banamo luhak 50. Kok sudah sampai kaulu balumlai sacukuknyo, dek kalah niniak nan daulu, tadiri kunci nan limo. 

1.     Disitanang Muaro lakin diujuang aua tanah bamungguak banamo dindiang tambago, kok anyuk sarok dari ulu rando kok bajalan surang kok, lalu dagang dari hilia kok tagampa anak limo puluah. 

2.     Kunci loyang ditarantang sari lamak kapanahan upeh racun datuak Marangka Panjang jangguik nan diam di Kampar kanan, datuak marangkah panjang gigi nan diam di kampar kiri anaknyo nan salah-salah laku nan buruak angkuah bakamainan upeh racun, nak jan lalu ka luak limo puluah, nak jan binaso luak kito. 

3.     Didirikan kungkung parangkok dikoto laweh kapanahan anak piluru nan sambilan nan lia-lia jangek, urang Nan taba-taba kulik bakaimanan ka ateh kato nak jan lalu ka luhak kito. 

4.     Didirikan pasak hulu disarik laweh batu ampa, panahan tingkah jo laku, tapung jo tepok anak agam, padang tarok nan inggan ladosulah mudiak nan inggan pinang mancua hilia urang dubalang kasadonyo nak jan lalu ka luhak kito. 

5.     Didirikan pasak jalujua disitujuah, kok datang adat jo pusako atau lukis jo limbago dari 4 balai, kok tibo sudi jo siasek atau usua pareso dari daulat dipertuan tagak nak jan tasundak, malenggang nak jan ta pampeh nak jan binaso luhak 50 itulah dindiang pagarannyo dalam luhak 50.

Dek peti nyatolah bosi talatak dianjuang rang dalimo lah dibuek pasak jo kunci, tadiri rajo nan balimo 

1.     Rajo di Luhak Dt. Indomamangun dari tanjuang surau mudiak dari kaki gunuang hilia 

2.     Rajo di Lareh Dt. P. Simarajo di Sitanang muaro lakin, digaduik tabiang tinggi sampai ka aua tanah bamungguak 

3.     Rajo di hulu Dt. Simagayua nan mangiang disitujuah banda dalam, nan bajanjang ka ladang laweh, nan bapintu  kasungai patai. Tak adok kabaso ampek balai 

4.     Rajo di sandi Dt. Parmato Alam nan putiah, muaro mudiak disikabau hilia 

5.     Rajo di Ranah Dt. Bandaro Itam, Koto Tuo jo Mungka jopang manganti, Taeh jo Simalanggang, Piobang jo Sungai Baringin, Gurun jo Lubuak Batingkok, Tarantang jo Sarilamak, Solok jo Padang Laweh, Salilik Batang Sinama Salelok Batang Lampasi itulah kakuan Dt. Bandaro Itam. Tatagak tiang nan tigo 1. Galanggang sijambi, 2. Balai Kubang, 3. Balai Jariang

Anjalai daunnyo 7, dibaliak batang giriang-giriang, dek balai pintu nyo 7,  enten diranah aia tabik digalanggang balai jariang, tabukak pintu nan 7, tarantang labuah nan 7, balimo rang gadang-gadangnyo,
=     Mungo jo Koto Kaciak baranak ka silaih
=     Andaleh jo tanjuang kubu, baranak ka banda tunggang
=     Sungai Kamuyang nan tungga nan ingan sawah tangah, mudiak nan inggan kaki gunuang hilia
=     Aua Kuniang jo tanjuang Pati baranak ka gadih angik
=     Limbukan jo Padang Karambia baranak ka Limau Kapeh
Itulah anak  jajatan Babapak ka limo suku
Latak kok indak sajahatan Baitu riwayat rang daulu
Dan kato jo baitu, basiang dinan tumbuah, manimbang dinan ado. Tumbuah sarupo iko kini cupak panuah gantang babubuang, abih cupak dek palilisan, abiah adat dek bakarelaan, Samo kito sarahkan sajo pado Allah, nak jan tarancah dinan asiang, nak jan takato dinan bukan nan lia jadi angan-angan, nan jinak kan kami cakau kami mangambiak ujuang pangabisan kato datuak tadi, nan jadi ujuang pangabisanyo talayang siriah kamuko kami nan basamo, siriah sacabiak nak bakunyah, pinang sadidiah nak bagatok kan baitu kato datuak. Tumbuah sarupo iko kini sawajah adat nan mandatang kapado pisako nan mananti
Didalam cupak nan duo, dikaji kato nan ampek, didalam tambo kato basuo disanan pareso dapek dilahia samo dipakaikan dibatin samo diamakan baitu panjawabnyo dari kami.

Bagian X

PASAMBAHAN SIRIAH

Alek :

Dt.... Pasambahan tibo bakeh Dt.!

Sambah nan di tibokan titah nan di antakan, nak sarapeknyolah niniak jo mamak, sifat tahalia di ateh rumah nangko, Usah kadibilang di atok gala aratinyo sambah sajo di muliakan.

Sambah nan di tibokan titah nan di antakan, ma agak ii hari nan kapatang , siriah nan bacabiak jo bisan, korong jo kampuang, kini alah bapinang bagatok, kahadapan karib jo kabiah, ipa jo hadirin.

Ba - apo dihari nan sahari nangko, janjang batingkek, bandua batapuak, duduak sahamparan, tagak saedaran, manimbang sapanjang adat, magaji sapanjang alua, ciek jo duo, duo jo tigo, alah banamo salasai.

Picak nan satapiak, bulek nan sagiliang adat nan bapakai, karib jo kabiah nan batamu, aak jo bapak lah basuo, duduak bahadapan, tagak batantangan.

Maisok Santo jo daun, duduak nak baiyo,tagak bamuah, sakian sambah di antakan kahadapan datuak...

 

Si Pangka :

Sampai Dt

Ma- agak ii rundiangan datuak nan katangah, sunat kato dek baulang, pasa jalan dek batampuah, buah panitahan Dt nan ka ambo ulang. sambah manyambah di pulangkan pado Allah, kto sajo di pakatokan, apolah nan jadi buah kato dari datuak cako, ma agak ii hari nan dahulu, siriah nan bacabiak, pinang nan bagatok, kahadapan karib jo kabiah, ipa jo bisan nan mangadiri pakarajoaan nangko.

Baa Apo di hari nan sahari nagko janjang batingkek, bandua batapuak duduak bahamparan tagak saedaran

manimbang sapanjang adat, mangaji sapanjang alua, alah ciek jo duo duo jo tigo,alah banamo basalasai, tumbuah nan bak banyiah, tabik nan bak padi, tabik di sriah nan bacabiak lah batamu, anak jo bapak lah basuo, duduak bahadapan tagak batantangan maisok santo jo daun, duduak nak baiyo, tagak nak bamurah kan baitu bana panitahan datuak ?

 

Si Alek : Iyo Bana

 

Si Pangka :

Sapanjang buah panitahan datuak nan katangah lamak bak raso santan, manih bak raso tangguli, tapi sungguahpun baitu elok kato jo mupakat, lamak kato di pakatokan, ambo baok kato jo mupakat saba datuak jo Panitahan...Laii kok dalam adat nan bapakai, dalam cupak nan baisi nan baitu datuak ?

Si Alek :

Sampai Datuak ?

Sapanjang buah panitaha datuak nan katangah, kok di danga lah babunyi, di pandang lah barupo, kateh samo bapucuak kabawah samo baurek, Limbak nan dari pado itu, duduak nan samo sahamparan, tagak nan samo saedaran, hambo baok kato jo mufakat, kan baitu bana buah panitahan datuak?

Sipangka : Iyo Bana !

Si Alek : tibonyo lah dalam adat nan bapakai, dalam cupak nan baisi, kato katibaok jo mufakat dt.

Sipangka : Kalo baitu saba mananti datuak ?

 

Si Alek : Sa-Kiro kiro

: Dt Mambaok kato mufakat jo niniak mamak, alim ulama, cadiak pandai, dan nan patuik patuik dan hadia dalam acara upacara baralek dan sudah tu mambaliakkan rundiangan ka si pangka.

 Sipangka 

di hari cako datuak saba jo panitahan, hambo mambaok kato jo mufakat, jo nan duduak sahamparan, tagak saedaran, picak nan satapiak, bulek nan sagiliang adat nan bapakai, sabuah kato lah bapakatokan, labiah bak maisok santo jo daun, tu bana nan ambo hantakan bakeh datuak.

Si Alek : Sampai datuak ?

di hari cako ambo saba jo panitahan, datuak marenjeang kato jo mufakat, jo nan duduak sahamparan bulek dan sagiliang adat nan sapakai , sabuah kato lah bapakatokan, labiah bak maisok santo jo daun kan baitu bana buah panitahan datuak ?

Sipangka :

kateh lah samo sapucuak kabawah lah samo saurek nan kito ba-apo dt ?

Si alek ; nan kito babateh.

 

Sipangka : Yo ma Datuak !

Dahulu kato basitinah, kamudian kato basicapek, iyolah capek tibo bakeh datuak.

Kacapek an tibo bakeh datuak, ma agak ii rundiangan kito cako, alah ciek jo duo, duo jo tigo, alah banamo basalasi . Sungguahpun bak raso basalasai tumbuah nan bak banyiah, tabik nan bak padi Siriah naiak carano katangah, siriah kami nak mintak di kunyah, Itu bana di anta kahadapan datuak .

Si Alek : Sampai datuak !

Sunat kato dek baulang, pasa jalan dek batampuah, buah panitahan datuak nan ka ambo ulang, apolah nan jadi buah panithan datuak cako, kok di danga lah babunyi, di pandang lah barupo, kateh , ta ambun jantan, kabawah takasiak bulan, lamak baraso santan, manih baraso tangguli nan tumbuh bak banyiah, nn tabik bak padi, pihak disilang nan bapangka , karakok nan bajunjuang karajo nan papokok, siriah naiak, carano katangah, siriah kami nak mintak di kunyah, kan baitu jinih buah panitahan datuak ?

 Sipangka : iyo bana !

Si Alek :

Rundiangan datuak nan katangah , bulek lah buliah di golekkan picak lah buliah di layangkan tapi sungguahpun baitu , lmak siriah lega carano, lamak kato lega bunyi, lamak lauak dek pamasak , elok kato jo mufakat, saba datuak jo panitahan. laii kok dalam adat lamo pusako usang nan baitu ?

Sipangka : kok itulah bana .

Si Alek : Yo ma datuak .

 di hari nan cako datuak saba jo panitahan, hambo mambaok kato jo mufakat, jo nan duduak sahamparantagak sa edaran, sapanjang parmintak an dt nan katangah , pintak buliah kandak balaku Sabuah kato di pakaokan, labiah dek mangunyah siriah jo Pinang itulah bana di antakan kepado datuak.

Sipangka : Sampai datuak.

Kok hilia lah sarangkuah dayuang, mudiak lah satimbang galah nan kito ba - apo datuak .

Si Alek : Babateh 

Bagian XI

PASAMBAHAN SIRIAH KAMPIE

(ALEK JO PANGKA)

ALEK :

Pak Datuak juo nan ambo imbau !

Sungguahpun Pak Datuak surang nan taimbau dek ambo, aratinyo bana sugalo silang sapangka karajo nan bajunjuang, ambo datang dari ilie lai bajalan babuah batih, malenggang babuah tangan, a bana lah buah tangan ambo iyo lah siriah nan jo kampie baisi sacukuiknyo, nan ambo mintak bakek silang sapangka karajo nan bajunjuang , liek lah siriah ambo, ambiak, makan ateh namo sakapue surang, sakian bana

PANGKA :

Lah sampai Palo Mudo ?

Sapanjang kabanaran Palo Mudo tadi handak - handaknyo munuruik adaik ibaraik gayuang capek tasambuik, kato capek tajawek, siriah capek taliek!, baa kini dek tasabuik dek Palo Mudo kami nan baduo batigo silang sapangka karajo nan bajunjuang, yo bajalan ambo handak baiyo, bakato nak bamolah, mananti Palo Mudo sabanta, baiyo ambo dulu

ALEK:

Lah sampai Pak Datuak ?

insyaallah ambo nanti

PANGKA :

MAMPAIYOKAN. Lihat: MAMPAIYOKAN MALIEK SIRIAH

PANGKA :

Palo Mudo !

Baa nan kato mandatangan siriah Palo mudo kabakeh ambo,Baa nan siriah nantun ibararaik gayuang alun basambuik, kato nan baru bajawab, siriah alun baliek, a nyo nan lai janji nan batiboan, dek Palo Mudo lah mananti, dek ambo alah pulo bapaiyoan, tantang paiyoan ambo nantun, lah dapek kato sapakaik, kok bulek lah buliah digolek an, picak lah buliah dilayangkan, lah saiyo kaji tantang nantun, tantang gayuang kamanyambuik, kato kamanjawab, kamaliek siriah pun sakali, iyo diambo pulo tarabik e komah, kabaa pulo kolah, sakian bana

ALEK :

Lah sampai Pak Datuak?

Baa nan kato Pak Datuak tadi gayuang kamanyambuik, kato kamanjawab, kamaliek siriah pun sakali iyo dibadan diri Pak Datuak bana Tarabik e komah, kan baitu, baa dek ambo PakDatuak, dek karano kito juo dari tadi nan bajawek daun bajumbai aka, dinan lain lai ambo nanti, kini lah di Pak Datuak bana tarabik e, insyaalah, ambo tarimo suko, sakian bana

PANGKA :

Baa iyo ambo liek ?

ALEK :

Insyaallah Pak Datuak

PANGKA :

Alah, Lah ambo liek Palo Mudo

ALEK :

Dek ambo handak e, siriah ambo diliek, diambiak, dimakan sakapue surang, labiah sakapue elok bana

PANGKA :

Lah sairiang tungkek jo tuga mah Palo Mudo, alah baliek, alah pulo baambiak

ALEK :

Alah baliek, alah baambiak, alah pulo bamakan Pak Datuak?

PANGKA :

ooo tantang pado bamakan nan Palo Mudo tanyokan ?

Baitu Palo Mudo, tantang pado bamakan,  putuih kaji batarikaik, putuih ilimu banasakah,dinasakahan pakiah mangaji di surau,mangaji zat jo sifaik,aratinyo bana , indak bana dimaka sifaik e alah bamakan, akan tatapi ateh sakato jo Palo Mudo

ALEK :

Ateh sakato jo ambo, alah bamakan siriah ambo namo e tu Pak Datuak ?

PANGKA :

Alah

ALEK :

Kini baitu Pak Datuak, Baa nan kato mandatangan siriah ambo kabakeh Pak Datuak, baa nan siriah ambo tu, ukeu diliek alah baliek, ukue baambiak alah baambiak, ukue dimakan alah pulo basifaik an, baa kiniko lamo satariak sakutiko, lamo sabanta antaroe, takana pulo dek ambo nak maasak jo maansue, siriah salabiah PakDatuak ambiak nan talatak dalam kampie, jo kampie- kampie pun sakali, alah kabana ambo ansue Pak Datuak?

PANGKA :

Sampai Palo Mudo ?

Baitu Palo Mudo, ambo iyo bajalan nak baiyo, bakato nak bamolah, mananti Palo Mudo sabanta, baiyo ambo dahulu

ALEK :

Insyaallah Pak Datuak

PANGKA :

(MAMPAIYOKAN. lihat: MAMPAIYOAN MAASAK JO MAANSUE SIRIAH

PANGKA :

Palo Mudo !

Kini baitu palo mudo, baa nan kato mandatangan siriah Palo Mudo kabakeh ambo, baa nan siriah nantun ukeu baliek alah baliek, ukeu baambiak alah baambiak, ukue bamakan alah pulo baaifaik an, baa kini lamo satariak sakutiko, lamo sabanta antaroe, takano pulo dek Palo Mudo handak maasak jo maansue, Siriah salabiah ambo ambiak nan talatak dalam kampie, jo kampie-kampie pun sakali, alah kabana ambo ansue kan baitu?

baa dek ambo Palo Mudo,iyo rumik kajawek e mah, baa bana lah rumik e, rumik bedo bakalang labu, angguang gayo jalan basimpang, ilie antah mudiak pun ragu, disinan hati mangko bimbang, a bana lah aratie tu, jauah mambao siriah Palo Mudo, ampie manyiriahan Palo mudo pulo, pulang maklun kabakeh Palo Mudo jo lah tu, sakian bana

ALEK :

Pulang maklun kabakeh ambo jo Pak Datuak?

PANGKA :

Tantang pado maasak jo maansue, iyo !

ALEK :

Ambo iyo nak maasak jo mansue

PANGKA :

Ati ambo lah badatak jo mah.

Insyaallah, ansue lah

Bagian XII

Pidato Pasambahan Adaik Pasambahan Siriah

Pidato Pasambahan Adaik

Alek           :   Taantak puntiang ka hulu – di bawah kiliran taji – asamulo kato dahulu – tigo limbago nan tajali. Partamo sambah manyambah – kaduo baso jo basi – katigo siriah jo pinang. Sambah-manyambah dalam adaik – tali batali undang-undang. Nan tasabuik di muluik manih – nan tapakai di baso baiak. Muluik manih talempong kato – baso baiak gulo di bibia. Baatunyo kini, sikaduduak badaun mudo – kudo bagolek di jarami - datuak duduak bungkusan tibo – iyo nak mintak diparesoi. Nak tantu isi di dalam – urang balimo badunsanak – lah kok cukuik kasadonyo. Sakian Angku.

Sipangka   :   Sapanjang pituah Angku nan tu – dari ujuang sampai ka pangka – sapantun bana jo urang baalang-alang; dirawik dikarang bingkai –badan ditimpo jo karateh – bari babanang bataraju, diukia babego-bego, ukia sudah ragam ndak jadi – kok jadi banyak sansaronyo. Baa sabab mangkok baitu, jikok dilapeh kutiko bak kini – iyo ka angin nan basiru – naiak ka awan nan manjuju – bakumpa-kumpa jo kabuik, sadang di ruang-ruang mato – badan jauah babuni ampiang, dek kareh ribuik jo topan – banang putuih tarajupun lapeh – mato lah putiah mamandangi, samintaro tangan ka taraju – mananti banang ka kumparan. Sabalah Angku sakutiko.

Alek           :   Iyo, basaba kami Angku.

Sipangka   :   Tantangan pituah tadi, iyo bungkusan nan ka tangah; Lai barisi siriah jo pinang – langkok jo sadah sarato gambia, timbakau samo di dalam. Manuruik kandak Angku – yo nak mintak dipareso, kok rupo alah kami caliak – roman alah kami pandang. Tapi saketek nan marusuah; Karakok tumbuah di batu – nan mudo daunnyo lareh – mangakok kami nan ragu – namo jo gala nan ndak jaleh. Sakian Angku...

Alek           :   Manuruik pituah Angku tadi, dek kami nan sagalo alek; sahari ado sahari banamo – sahari lahia sahari bagala, tantangan namo jo galanyo; bia kami uraikan ciek-ciek; Siriah si Alai nak rang Kamang, siriahnyo udang tampak ari – tampuaknyo bagai kuku balam – babuah intan jo podi – babungo sakali balum – satahun dalam panggulungan – usahkan litak letoi tido, usahkan layua lisuik indak. Makanan anak rajo-rajo – makanan anak sutan-sutan – pamenan niniek jo mamak – di dalam luhak nan tigo – banamo alam Minangkabau. Tantangan pinang nantu; pinang si bulek koto tinggi – pinang koto dibalah ampek, tingginyo jangkau-jangkauan – baurek taguah ka bumi – bacewang sampai ka langik, tinggi nan indak tinggi bana – satahun tupai mamanjek – samusim si lodang jatuah – jatuah ka bumi manjadi ambun – banamo Ambun suri/ jantan itu namonyo pinang kami. Tantangan sadah kok dikaji; asa nan dari kulik lokan – dipanggang di lereang bukik, samusim dipanggang cino – satahun dipanggang bugih, bakipeh barambai-rambai – putiah nan bukan alang kapalang, dijalik jo jari manih – bakisa ka jari tangah – tabayang nan punyo rumah – buatan puti dari maninjau. Tantangan gambia kok dibilang; untuang buruak nan nyo tapati – baikek bakabek pulo – dirabuih dalam kuali – mati jo baji pambunuhan – buatan puti Sari lamak. Tantangan timbakau kok dikanang; di dalam luhak Limo puluah, bukik banamo bukik Guntuang; saeto panjang julainyo – pisau jo jangko manyudahi, masiak barambun tangah malam – baun nan sampai ka udaro – buatan sutan Amirullah. Baatunyo kini, nak salamaik samparono, bawuakanlah dalam pakapuran – kalek nak tingga di karongkongan – merah nak tingga pado bibia. Sakian Angku.

disusun oleh kawan-kawan di "Kacimpuang pamenan Mandi" di bawah arahan Halvi Hamid Mangkoto Sati, yang anggotanyo terdiri dari anak Nagari Muaropaneh Kabupaten Solok nan ado di Jakarta dan sekitarnyo

Bagian XIII

PASAMBAHAN SIRIAH

Dari : nagarisitalang.wordpress.com

Posted by Nagari Sitalang on 25 Februari 2010

Ditulis Kembali Oleh : I. St. Sinaro

PANGKA
Iyo kabakeh Sutan juo sambah dipohonkan.-

ALEK
Manitahlah….

PANGKA
Sungguahpun iyo kabakeh Sutan dipohonkan sambah jo panitahan, nak sarapeknyolah Angku Pangulu nan gadang basa-batuah, karapatan dunsanak jo sudaro, ipa dengan bisan, ahli nan saisi rumah-gadang nangko.—-
Sakali ambo mandatangkan sambah, indak kadiatok dibilang gala, hanyo kapa-tok pambilang gala, jo ma’af sajo dimuliakan …. Sapihak sambah jo panitahan diparirikkan kahadapan silang nan bapangka karajo nan bapokok, ujuang panitahan kahadapan Sutan.-

ALEK
Yoooooolah ….

PANGKA
Adat kato nan kadipasambahkan: Talatak putiang diulu, dibawah kumpalan tali, samulo kato nan dahulu, tigo limbago nan tajadi.- Manolah tigo nan tajadi, partamu sambah manyambah, kaduo baso jo basi. Katigo siriah jo pinang.- Sambah manyambah dalam adat, tali batali undang-undang, tasabuik jo muluik manih, tapakai jo baso baiak. – Muluik manih calempong kato, baso baiak gulo dibibia, didalam cupak nan piawai, banamo adat sopan santun.—
Adat dilawik bajuru-mudi, adat disabuang bajuaro, adat dialek barajo janang.- Kok dikaji tantang juru mudi, tau di angin nan basiru, tau diombak nan basabuang, tau dipasang turun naiak. – Kok dikaji tantang si-juaro, tau dituah sisiak ayam, tau dibulang nan bakicuah, pandai managah manampin taruah.- Kok dikaji tantang sirajo janang, tau diereng dengan gendeng, tau dicakak dengan baik, manjago labiah dengan kurang. —- Ba-a sakarang iko kini :

Ramo-ramo tabang malayang
Malayok kakoto tangah
Banyaknyo ampek puluah ampek
Endah carano bukan kapalang
Talatak ditangah tangah
Dilingkungan urang nan rapek
Buruang sinurak buruang nuri
Siculiak ateh pamatang
Siriah galak pinang maanari
Mancaliak alek nan lah datang

Lorong kapado caranonyo, carano Banja Renoali, buatan tukan Kotogadang.- Nan rimbun bungo kalikih, nan ranggah bungo kacubuang, nan kungkun gagak kainggok, nan lantiak alang bamain.- Sataun dipanggang Bugih, samumsim dilingka Cino, usahkan ratak, rangehpun tido.—
Pihak kapado songkok carano; dalamak urang namokan : Tanun banamo silang suto, baukia bubungo rampai, baturap jo banang ameh, balukih bak kaluak paku, ragi nan samo baliak –balah. – Baratuih camin dipinggia, batabua kaco ditangah, kileek kumilek cahanyonyo, sarupo bintang ateh langik, bintang kujarah bakuliliang.—-
Pihak kapado sisiriahnyo, siriah udang tampa hari; tampuaknyobak buku balam, gagangnyo bagai suaso, buah diambiak katinaman, batang diambika katiruan, sataun dalam guluangan, usahkan masiak layua tido, malah batambah mudo juo, –konon pulo pinangnyo, pinang sierak-ero manih, tumbuahnyo dikida rumah, tingginyo panjek-panjekan, randahnyo jangkau-jangkauan, pucuak malepai awan putiah, sataun tupai dek mamanjek, jarang basuo jo buahnyo.—
Salorong kapado digambianyo, gambia kuniang sarupo dadiah, buatan puti Sarilamak, manihnyo tingga dilidah, kaleknyo tingga dirankuangan, daun malayok kalautan, tibo dipulau batebaran. —- Kok kunun pulo disadahnyo, sadah putiah ambun bajano, dibasuah jo aiya bungo, dipati jo pati santan, dikipeh jo ambai-ambai. – Dipalik jo jari manih, bakisa kajari tunjuak, mambayang katapak tangan, sapalik sapuluah ameh, sakadam sakati limo. – Harago nan tidak taragoi, harago satimbang jo nagari, makanan anak rajo-rajo, pamenan bibia puti-puti. —- Pihak kapado timbakaunyo, timbakau aluih ambun bajelo, bijonyo datang dari Ruhum, pakirin dayang dilautan, diabo anak Sutan Bantan, diracik anak garagasi.- Saheto panjang jaluanyo, bajamua dibiliak dalam, bapantang masiak dek paneh, masiak dek ambun tangah malam.

Tanam siriah tanamlah udang
Tanam karakok dihalaman
Cabiak siriah gatoklah pinang
Guuluanglah rokok pamenan tangan
Mudiakkan sawah dialai
Hiliakan sawah taruko
Kok banyak siriah dibalai
Sado iko dalam carano

Ayam putiah tabang batali
Dilurah mangko maraok
Batalua dirumpun sariak
Anaknyo turun salapan
Makanlah siriah pinang kami
Bapapatah mangko disingkok
Baibarat mangko dicabiak
Sapahnyo bari bajunjuangan

Sakianlah sambah ditibokan, kahadapan Niniak dengan Mamak, sarato alek tangah rumah, alamat titah ka St. Parpatiah.—

ALEK
Alah sampai dek St. Sinaro ?.-

PANGKA
Dibilang alah ….

ALEK
Ruponyo sapanjang buah panitahan Sutan, nan tatabua kenan banyak, nan talayang katangah-tangah, tatumpah kapado ambo;
Kalau didangalah baiak Bunyi, dipandang lah rancak rupo.- lah bunta sawah nan sapiriang, lah masak sando padinyo.-
Tapi samantangpun baitu, dek padi bukan satangkai, dek pipik bukan saiku.- Dek padi bukan satangkai, masak indak sakali ambiak, dek pipik bukan saikua, tabang indak sakali inggok, apolah sabab dek baitu : karano kami lai baduo batigo dihadapan niniak jo mamak, sarato imam dengan khatib, cukuik jo alek nan banyaakko.- Mako ka-ambo cubo marantang panjang, untuang taserak jalo suto; kok untuang ikan nan kabuliah, kok indak am eh tantangannyo…. Sakironyo ambo bao bakato baiyo bajalan bamulah, laikoh adat nan baitu, laikoh pusako nan bak kian, nak bapambarian St. tantang itu….

PANGKA
Lah banamo sampai dek St. Maruhun?.-

ALEK
Sakiro alah ….

PANGKA
Tapi tantangan sambah-manyambah, randah nan dianjuang tinggi, ketek nan diamba gadang, jo maaf dimintak parundingan dikumbalikan kapado Sutan?…

ALEK
Manitah Sutan ….

PANGKA
Ruponyo parundingan nan kadikumbalikan kabakeh Sutan; nan manjadi kabanaran dek sutan madok kabadan diri ambo: Dek karano kami lai baduo jo batigo, dihadapan ado Niniak Mamak, sarato alek nan banyakko, nank cubo mampaiyo-patidokan, ditantangan kato nan kamanjawab, ditantangan gayuang nan kamanyambuik, lai koh adat nan baitu, lai koh pasa nan bak kian, kan baitu kato Sutan tadi ???….

ALEK
Iyo bana….

PANGKA
Yo baitu biaso nan bapakai, alah digarih makan paek.-
Dapek surang dibuleti, dapek baduo-batigo dipaiyokan.- Baa-tonyo lai kini, asa dapek surang dibuleti, dapek baduo batigo dipaiyokan, lah rancak bana nan baitu Sutan.-

ALEK
Sampai dek St. Sinaro ?.

PANGKA
Sampai ….

ALEK
Dek ambo muluik sapatah itu bana nan ambo nanti Stan, rundiang sabuah-tu nan ambo tunggu.— Baa-tu nyo lai : Uumpamolah gugua dari tampuak, umpamolah sakah dari dahan, Insya Allah ambo paiyokan, lai kasaba Sutan Mananti ?.-

PANGKA
Jo saba hati Sutan ….

ALEK
Nan parundiangan kito kini ?.-

PANGKA
Dibateh ….

ST. MARUHUN
Imam Sinaro ?.-

Imam Sinaro
Manitahlaah…

ST. MARUHUN
Dek awa kato nan sapatah, salam tajelo ka nan rapek, kato tatabua dinan banyak, jo parsambahan Mamak ambo jalang.- Ujuiknyo sambah nan tatimpo pada mamak, nyato tawalak di ukuran, tabayang barih dibalabeh, bana bak andai kato bida :

Dek curiang barih dahulu
Diawa kato nan sapatah
Sambah tibo dialek jamu
Nan datang dari pihak sipangka.-

Ba-a tu nyo lai kini : Karano sasuai juo bak undang kato Mamak: Babiduak kan iyo banangkodoh, kok bajalan banantuo.- Mako taradok sambah jo titah dari sapangka kpd alek ambo tatiangkan kanan tuo, kato bajawab, gayuang manyambuik kadari Mamak tarabiknyo…. Sakitu sambah Mak ?…..

ALEK
A-yo maa-nyo St.Sinaro ?…. Sambah tibo pado Su tan.-

PANGKA
Mani tahlah….

PANGKA
Jo kabanaran Sutan ambo jalang, tapi sungguahh jo kabanaran, rila
Rila jo maaf dipohonkan. —- Adopun antaro ambo jo Sutan cako, panek nak jadi parantian, patang nak jadi pamalaman, iyo disatantang bakato baiyo, bamulah. —- ulunyo lah ambo mudiak-I, muaronyo lah ambo iliri, ditapak sapanjang alua. Tagah dek patuah kanan tuo sutan, nan tuo patuah ka Pangulu, ruponyo satantangan kato kabajawab, gayuang, kamanyambuik, tatumpah juo kadiri ambo.—-
Tapi sawajah dari pado itu, saketek nan marusuah nan manggamang diambo kiniko sutan.- Kalao nan sa-andaknyo, kan iyo sabanyak tanyo sabanyak jawab, sabanyak gayuang sebanyak sambuik.- Baa tu nyo kini, kok indak taulang bak manyapuah ndak tabaliak bak mamanggang, kaba-a ko lah???-A-iko ambo pulangkan ka Sutan.-

PANGKA
Lah banamo sampai dek St. Maruhun?.-

ALEK
Sakiro alah ….

PANGKA
Ruponyo nan manjadi buah panitahan dek Sutan mahadok kaateh badan diri ambo, iyo malah jikok bak diateh andaknyo, diukuran nan sampai, dibilangan nan cukuik, iyo sabanyak gayuang sabanyak sambuik, sabanyak kato sabanyak jawab.- Baa-tu-nyo kini, kok indak taulang bak manyapuah, kok indak tabaliak bak mamanggang, kabaa-kolah, kan baitu Sutan?

ALEK
Yooooolah ….

PANGKA
Diambo kaji nan marusuah nan manggamang, iyo kaji nan saganok itu; gauyuang kok indak disambuik, kato kok indak dijawab…. Baa satantang itu, asa kan kato lai kabajawab, kadisambuik, indak kadiuji samo merah, indak kadikati samo barek.- Panjang jo singkek pado Allah disarahkan.—

ALEK
Alhamdulillah kajaweknyo Sutan… Ambo sangko taditu: Kok kabalari samo kancang, baramuak samo dalam.- Ndak doh lai : Diateh kami alek, sebagai tagak nan bapusu, duduak nan baropok, nak ambo baiyakan amanah nan bapagang, nak ambo lansaikan utang tapabuek….

Sairing balam jo barabah
Balam tabang barabah mandi
Sairiang salam dengan sambah
Salam datang sambah kumbali
Kumbali juo kapado Sutan

Yoo, maa-nyo St, Sinaro???….

Anak ayam pandai baranang
Dapek kakinyo dek buayo
Duduaklah Sutan jo batanang
Ambo kamulai jo bicaro

Adopun satantang buah panitahan Sutan cako: Taserak nak ambo piliah, dipiliah lalu dikampuangkan; kok anyuik nak ambo sonsong, disonsong lalu kaulunyo, apolah jinih panitahan sutan tadi : “Dek carano alah katangah, sarek barisi kalangkapan, mako jokok maliyek diateh rupo, basiang di ateh tumbuah, tumbuah sarupo iko kini: Siriah sacabiak mintak dikunyah, pinang sagaiyang mintak digatok, dipipia gambia dipalik sadah, dek kami alek nan datang, kan iyo baitu bana kasaiyahnyo Sutan ??? …..

PANGKA
Yoooooolah….

ALEK
Takilek camin diudaro
Jatuah kalawik batu karang
Hilang disemba ikan iyu
Dek bana sambah nan tibo
Laiyanyo kapado ambo surang
Batin kaado alek jamu

Kato warih kato bajawek, kato pusako kabatolong, manuruik papatah jo patitih, basuo pamenan adat :

Baatanun kulindan suto
Sajalan ragi jo banang
Timpo batim po salam tibo
Batanun kulindan suto
Sajalan ragi jo banang
Suri dimano talataknyo
Layang malayang sambah tibo
Timpo-batimpo sambah datang
Titah ka-ambo tahantaknyo

Kato tapegang dek Pangulu, rundiang tasimpan dinan rapek, awa jo akia kok sapakai, laiya jo batin kok sasuai.- Pihak jok kato kamanjawab, iyo jo gayuang kamanyambuik, tapek di ambo tarabiknyo.—– Sungguah diambo tarabiknyo, nyato adat barati tumbuah, nyato pusako bainggiran,- Bacupak talago panuah, Bagantangan simahar jolelo, undang-undang maisi kandak.- Karano sabab nan baitu, kato iyo kato-baturuik, kato indak kato mati, kato antah kato tatagun, luwiakato umum kato suhabat kato mambunuah, usah basuo nan bak kian.- Mako digilinglah kato jo mupakaik, dikaka rundiang jo nan patuik, dapeklah kato sabulek, nan buleknyo indak bapasagi, kini lah buliah digolongkan.- kok picaknyo indak basuduik, picaklah dapek dilayangkan.—-
Tibo kami dipabasokan, basapu laman nan sabidang, takuwak pintu bakeh lalu, tabantang lapiak paradani; talatak siriah dicarano, tando alamat putiah hati… Sananglah bana dalam hati Sutan: Baa-lah bana sanang hati, dek malin indak tabacokan, dek tukang alun talukihkan, Allah lah sajo nan ka-tau.—- Nak bak sakarang iko kini : Pihak dek kami alek Sutan, alah lah saujo lah salapeh, satanai salatakkan, salalah sakaja untuak manarimo siriah Sutan…. Tapi samantangpun baitu Sutan : Adopun masak siriah-ko 3 parakaro: Partamu masak digagang, kaduo masak dimakan, katigo masak jo mupakaik…. Nan dikatokan masak digagang: Rononya kuniang mangarisiak, tampuak layua daunlah kucuik, dek ulek indak talamakkan, dek samuik haram manjalari.- Nyampang gugua menjalang tanah, jan dicito kajunjuang lai, tampan kajadi sorak sajo, dalea nan sakah siriah masak.— Tasabuik masak dimakan: Sadang tangkai lai bagatah, maso daun lai baminyak, gilo dikijo pinang mudo, dirayu sadah jo gambia, bararak lalu kacarano.- Diupam manjadi satu, dikunyah bamerah bibia, kaleknyo ditingga dirakuangan, sarinyo naiak kaparoman.-
Kok dikatokan masak jo mupakaik: Alun dicaliak lah tapandang, lah jaleh bangun rawiknyo.- Alun dikicok lah taraso, la nyato lamak manihnyo:—-St, Sinaro???.-

PANGKA
Taruihkan Sutan….

ALEK
Salorong siriah Suriah nan katangah, nyato bukan masak di-gagang…. Tapi indak pulo kadimasakkan bamerah bibia.—- Izin jo rila dari sutan, siriah kamasak jo mupakaik:

Alun bakililleklah bakalam
Bulan lah sangkap tigo puluah
Alun diliyeklah dimakan
Raso lah tibo dalam tubuah

Sakian sambah dipuhunkan

PANGKA
Lah sampai dek Sutan Maruhun?….

ALEK
Sampai …..

PANGKA
Sapanjang parundiangan Sutan tadi, kok siriah kami alah batarimo, ditarimo bukan dimakan, dimaakan sajo jo mupakaik : “Alun diliyek lah bamakan, raso lah tibo dalam tubua”…. Kan iyo baitu tadi sutan ???.-

ALEK
Sabananyo…..

PANGKA
Urek sinyali-nyali rateh
Pucuak suruan mudo-mudo
Dilangik Sutan lalu-linteh
Ambo dibaliak itu pulo

Alhamdulillah, kok kandak iyo-lah buliah, namun pitak indak balaku.- Sanang lai saleso tido, tatungkai indak tarabahkan, lah rabah indak tadabiah…. Walau samantangpun nan bak itu, biya panuahnyo panuah kabawah, ambo lapehkan Sutan dari utang.— Hanyo kaganti pamujuak-mujuak tangih, tagamang kok raso kabajawek, tolong tarimo tanyo kami:

ALEK
Sutan Sinaro ?….

PANGKA
Lalu Sutan

ALEK
Ahamdulillah pado Allah, puji jo sanjuang pado Sutan.- dek maaf gadang paidah, dek rila gadang munpaat, lapehlah kami dari utang, siriahlah masak jo mupakaik.-
Adopun kamudian dari pado itu, lah tibo pulo sudi jo siasek sarato tanyo jo da-awa dari Sutan, apolah jinih bunyinyo:
Kok siriah dimakan jo mupakaik, sapahnyo
Kama Sutan buang, Aiyanyo kama diludahkan,
Kan iyo baitu kasaiyahnyo Sutan ???…
PANGKA
Yoooolah….

ALEK
Panggia bakandak turuik, Sutan;
kok imbau bakandak jalang, tanyo tantu bakandak jawab…. Kajawabnyo pulo dari ambo:

Anam koto babalai akaik
Urang manjua cawan pinggan
Langang kutiko hari hujan
Siriah dimakan jo mupakaik
Sapah dibuang jo rundiangan
Aiyanyo ditampuang karilahan
Sakian jawab dari ambo.-

PANGKA
Ba-a satantang siriah-manyiriah, lah patuik kito tuhuakan?

ALEK
Kito tuhuakan sampai siko.-

Bagian XIV

Pidato Adaik Pasambahan Siriah

nagarisitujuahgadang.wordpress.com

Manolah Datuak …[si Anu]… janyo ambo. Sakali ambo maimbau, sapatah rundiang nan lalu, walaupun Datuak surang nan di imbau, batin dek adaik kasamonyo.Pangana batin ka nan rapek, ujuiek sambah ka nan banyak. Sambah sujuik sambah tasimpuah, sa arek bungka nan piawai, naraco luruih main daun, indak basibak jo basisieh, bukan bahinggo jo babateh.Sambah tajelo di nan rapek, rundiang ta tabua ka nan banyak. Niniak mamak jo panghulu, nan taduduak ateh majilieh, niniak mamak jo ibu bapo, cadiak pandai jo candikeo, nan mudo arieh Budiman, kaum ibu samo di dalam, dalam panggilan ambo juo, salam di Datuak ditimpokan.

Ujuik nyo sambah nan ta unjuak, nyato tawalak diukuran, tabayang barieh jo balabeh, bana bak andai kato bida. Dek curiang barieh dahulu, dek andai pusako lamo, kok basiang di nan tumbuah, jikok manimbang di nan lai, tumbuah sarupo iko kini.

Manuruik papatah cupak jo gantang, dek banyak ragu kok tibo, dek lamo lupo kok datang, manusia basifat khilaf. Agak kok ragu juaronyo, nan tinggi kok kurang anjuang, nan gadang kok kurang amba, sabab dek sasak dengan sampik aluran di ateh kok di bawah, patuik di tangah kok di tapi, kok indak sanang sejahtera, kok kurang aman jo santoso, maaf dimintak banyak-banyak, izin jo rela dari Datuak. Limbak nan dari pado itu, adaik dek duo salanggano, cancang dek duo salandasan, puntiang talatak dihulu, dibawah kiliran taji, asa rundiang kato dahulu, tigo limbago nan tajadi. Partamo sambah-manyambah, kaduo baso jo basi, katigo siriah dengan pinang. Sambah manyambah dalam adaik, tali-batali undang-undang.

Tasabuik bamuluik manih, tapakai baso jo basi, sarato ereang jo gendeang, muluik manih pangarang baso, budi baiak tali pikatan, pahubuang silaturrahim banamo adat sopan santun.

Rajo alam Minangkabau, Pamuncak di Limo Puluah, iyo carano rang namokan.

Ramo-ramo tabang malayang, malayang ka koto tangah, banyaknyo ampek puluah ampek.Indah carano bukan kapalang, talatak di tangah-tangah, dilingkuang urang nan banyak, itu carano pulang pai, dari sipokok ka panggilan, dari pangka lalu ka ujuang, talayok ka ruang tangah, talayang ka ruang tapi, sampai dibujua dilintangi, nyato taunjuak bakeh Datuak, tibo di muko nan basamo. Carano banamo carano basa, datang nan dari tanah banja, buatan tukang sungai pua, tukang banamo Reno Ali, carano bak tiuang katabang, elok carano bak alang ka inggok, ba ukia ba pucuak rabuang, batatah bamego-mego, ba aleh kasap bakain rumin. Panuah barisi kalangkapan, kaganti baso jo basi.

Apolah jinieh kalangkapan, siriahnyo udang tampak hari, siriah tambalang kuku balam, gagangnyo bapantang putuih, buahnyo intan dengan podi, babungo lado basaluak batang, buah diambiak katinaman, daun diambiak kasusuak mandi, usah karatak ritie tido, usah kalayua makin hiduik.

Lorong kapado pinangnyo, pinang baruntuak nan baruntun, bak dasun dibalah duo, bak bawang dibalah ampek, batangnyo nan lingguraian, satahun tupai mamanjek, balun lay sampai kapucuaknyo, tingginyo jambo-jamboan, buahnyo jangkau-jangkauan, jatuah kabawah jadi ambun, banamo si ambun suri.

Lorong kapado sadahnyo, sadahnyo langkitang gadang, dibasuah jo aia ambun, babasuah jo pati santan, diambuih jo lingka cino, dikipeh jo ambi-ambi putiah, nan bagai banak balam, dipalik jo jari manih, bakisa ka jari tangah, mambayang katapak tangan, usah kausak makin panuah.

Lorong kapado gambienyo, kaba barito kami danga, buatan Puti Sarilamak, sapipia jatuah kasiriah, mambayang sampai kamuko, lamaknyo tingga dirangkungan, sarinyo naiak kaparumin, sirahnyo tampak dibibie, pariso maruang tubuah, sehat anggota katujuahnyo.

Lorong kapado nan santonyo, haluih saiknyo dek maraciek, banamo timbakau jao, raciek tukang dari piobang, saheto panjang jaluahnyo, harun satahun pajalanan…… Nak sampai niaik mukasuiknyo, ujuik mufahum naknyo sah.

Siriah sacabiek nak bakunyah, pinang sadidieh nak bagatok, sirahnyo nak dibibia juo. Itunyo jinieh sambah kami, sambah alah salah lah tibo, kato sungguah bana dibari, harapan kami nan basamo, sakian sambah pado Datuak, buni diharap nak kambali

AWAB OLEH DATUAK/PANGULU

Sutan … [si anu] …jenyo kami, lah sampai kato Sutan.

Sapanjang rundiangan Sutan, nan talimpah kapado kami, kok rundiang dijawek pikie, kato dielo jo mupokaik, adaik limbago iko kini, duduak baduo jo batigo, kato surang dibulati, kato basamo dipaiyokan, lomak siriah lego carano, lomak kato dilega bunyi, samantaro kami balega, mancari kato nan sabuah, sarato bona nan saukuah, mananti malah Sutan sakutiko.

JAWAB SiALEK

Sampai dek angku Datuak/Pangulu.

Sapanjang rundiangan nan katongah, suko lah raso dalam hati, tonang dalam kiro2, kok gayuang lai basambuik, kok kato lai ka bajawab, sapokaik kami mananti, sakitu nyoh kajawek angku Datuak/Pangulu.

(kemudian barisan datuak/pangulu dan niniak mamak lainnya bermufakat singkat, mampa iyo jo mampa tidokan sekedarnya, barulah sambah/kato dikembalikan)

JAWAB OLEH DATUAK/PANGULU

Oo Sutan… Sombah babaliak pado Sutan .

Sombah nan talimpah pado kami, kok gayuang mintak disambuik, kato mintak dijawek. manuruik Adaik jo Pusako, lah di paiyo di patidokan, lah dipakai ukua jo jangko, jo niniak mamak panghulu nan hadie ko. Dek duduak baduo jo batigo, duduak basamo jo nan tuo, pangulu ompek jo limo, talalai sombah kambalinyo, mo’oh di pinto kapado Sutan.

Lah dipandang jo mungkin patuik, jo alua naraco Adaik, ditiliek barih balobeh, kok luruih lah makan tiliek, bontuak dimakan siku2, lah di aie lopeh tubo, lah diukua makan korek, lokek ubek lah dinan sakik, lah dinan tumbuah kito basiang, lah ateh nan lai kito manimbang.

Hanyo ba’a nyo lai kini, tontang carano nan katongah, nan tahadok kamuko kami, ponuah barisi kalongkapan, barisi siriah dengan pinang, saroto sodah dengan gambie, cukuik timbakau diatehnyo. Nan manuruik pinto Sutan, siriah sacabiak mintak dikunyah, pinang sadidiah mintak digotok, kok sodah nak dipaliek, kok gambie nak dipipie, dipaliek jo jari manieh, dibeleang kajari malang, mancayo katapak tangan, sirah’e nampak dibibie, raso’e maruang tubuah, tando samo basuko hati. Kan montun bona kato Sutan ..?

Kok hanyo tontang disinan, lah jadi tangguangan ateh kami. Nan bak kato bida Adaik, kok lai bak kato papatah, lahie jo batin saukuran, isi kuliek umpamo lahie, gonggam orek pegangan toguah, tibolah lukieh dilimbago, habih siriah manjadi sopah, koleknyo tingga dirongkungan, pariso maruang tubuah, sehaik anggota katujuahnyo. Siriah sacabiek lah kami kunyak, kok pinang lah kami gotok, kok sodah lah bapaliek, kok gambie lah bapipie, lah kasonang hati Sutan.

JAWAB SiALEK

Ujuik kato buah rundiangan, nan talimpah kapado kami, bunyilah samo kito donga, rupolah sami kito liek, lah joniah bona bak dibasuah, lah toreh babak ditompi, lah nyato lokang dari kulik, lah nyato ruruik dari tampuak. Nan bak kato gurindam dalam Adaik, nak ulam pucuak manjulai, nak aie pincuran tobik, kok nak cincin golang lah buliah, nak cayo kileklah datang, nak haluih licin lah tibo, salosai rundiang di nan elok, kajadi sasi bungo jo daun, Adaik bajalan sandirinyo, sonanglah hati niniak mamak, suko hati ibu jo bapo, godang hati kasadonyo. Kok data lah balantai papan, licin lah nyato balantai kuliek, sunyi didalam kiro2x, sakitu nyo jawek ka angku Datuak/Pangulu.(YRT-MakUncu)

Bagian XV

ALUR SIRIH

Di edit dari :

HIMPUNAN TAMBO MINANGKABAU DAN BUKTI SEJARAH

Lima Kaum – 1978

A.      Mandatangkan Rundiangan

        (dari Alek)

Sipangka

Kini manolah datuak,

Kapado datuak dipohonkan salam.

Tantangan dari titah dengan sambah, taratik jo majelis, kurenah lelo jo tampan, ampun jo maaf ambo pintak.

Ado taraso dalam hati, ado takalang pado mato, lai talinteh dek fikiran, dek warih jawek bajawek, tumbuah basuo nan bak nangko, adat nan tigo kito pakai;

Partamo baso jo basi, alek nan wajib dipamulia jamu nan patuik dibasarkan, hereang gendeang baso jo basi, itulah sandi dalam adat.

Kaduo sambah manyambah, wajib sambah     ka  Nan  Satu,    tampek   kito mamintak ampun, janganlah lupo siang malam, sungguah batang lah mardeko, ingeti pucuak kok tahampeh,

Katigo siriah jo pinang ;

Jikok dikaji asa siriah, takalo maso dahulunyo, mulo ditanah rajo aceh, dibao puti lipek catah, dikakang jo banang ameh, dibungkuih jo cindai kuniang, usahkan layua batambah      hiduik,    tidak   dikunyah   tiok  hari, bukan dimamah tiok malam, dicari ukua jo jangkonyo, hari jumaat sadang tangah hari, atau didalam alek jamu, nan saparati iko kini,

Gambia sabuah nak dikupia, takalo maso dahulunyo, iyo ditanah rajo ruhum, dibao puti indojati, kadalam pulau ameh nangko, lieknyo bukan alang-alang, tidak takupia dengan jari, sabalun bismilah dibacokan, 

Pinang sadidih nak digatok, iyo lah pinang  asa  barasa,  sunduik  basunduik dalam adat, mambukak rundiang patuturan, sajak dahulunyo baitu juo,

Sadah dicupu handak dipalik, jikok dikajo asa sadah, takalo maso dahulunyo, datang nan dari tahnah arab, dari bukik jabal kubis, dibao Sekh Abdurrauf, putiah nan bukan alang-alang, mambayang kaateh langik, mangilek sampai masuak rimbo, tatagun di lauik sailan, mancari kawan nan sasuai, batamu dalam carano,  mancari rono nan sabuah, manyuruah barani dalam adat,  maklumlah datuak di bayangnyo,

Kalau dikaji asa timbakau, datang nan dari rajo cino, daun  nan   dari   tanah hindu,  dihelo bahunjun-hunjun, bakarajo budak nan  salapan, sapuluah  jo  induak-induaknyo, takambang lapiak  permadani  putiah,  sudah  diguluang dipilinkan,   bulek     nan   bukan     alang-alang,  itulah  tamsil  kato   adat,   nan  kan  jadi ujuang sambah  buatan  kato, dek  hambo  kapado datuak,

Siriah sacabiak nak dikunyah, pinang sadidih nak digatok, gambia sabuah nak dikupia, sadah dicupu nak dipalik, geleang rokok pamenan tangan, kunyah siriah pamenan bibia, baitu pakaian dalam adat, sambah lalu salam kumbali, titah dipulangkan pado datuak.

Sialek.

Iyolah sampai dek marah,

Kapado marah juo malah,

Ruponyo nan sapanjang buah kabanaran marah itu, cincin sasuai dengan jari, galang sasuai dengan tangan, limbago kito badunsanak, tapi samantang pun baitu, nan rancak kato jo mufakat, nan elok rundiang jo baiyo, kok baiyo kami tuo jo mudo, mufakat gadang jo ketek, nak sasuai lahia jo batin, sakato mamak jo kamanakan, barundiang     dakek     niniak    mamak, banyak pitunjuak jo pangaja, samantaro gayuang balun basambuik, samantaro kato balun bajawek, lai kok adat limbagonyo, lai kok lilih cupak gantang, nak bapitua marah tantang itu, sakian pulo salam pado marah.

Sipangka.

Iyo lah sampai dek datuak,

Ruponyo nan sapanjang buah kabanaran datuak itu, iyolah kato adat nan basabuik, aluran syarak nan bapakai, sudi siasek itu namonyo, baa nan sangko hati ambo itu cako, kok lupo datuak tantang itu, atau kok ragu dalam fikiran, baa nan sakarang kini nangko, lah caramin taruih dari dalam, mambayang lalu kamuko, urang mujalih pakai adat, tidaknyo lupo di dunsanak, lah rancak dilingkuang undang, mamakai kato jo mufakat, sasuai puntiang jo giriak, dikungkuang   saluak   timbago,

kueklah hulu mamacikkan, palalu sajo lah dek datuak, kami mananti baritonyo, sakian salam pado datuak.

Sialek.

Iyolah sampai dek marah,

Ruponyo dek marah itu kini alah mo titiak nan bak hujan, muluik sapatah hambo nanti,

jikok sabalun kato itu, dalam rusuah manaruah gamang, dalam cameh darah badantuang, baru mandanga kato itu, hati sanang hangok salasai, lawuik lah tantu kan dihadang, pulau lah tampak kan dituju, angin tanang riak salasai, hujan taduah kabuiklah tarang, rundiang taraso kan disabuik, tapi  samantang  pun  baitu,  sungguahpun  sanang dalam hati, sabuah pulo nan taraso,

Jikok mamandang hilia mudiak, lawehlah alam kan  ditampuah, leba lah rimbo kan dituruik, jalan panjang labuah baliku, sapuluah koto manjorok, sabaleh tanjuang baliku, tujuah muaro didalamnyo, banyaklah jalan nan basimpang, jikok taturuik di jalan panjang, jikok talambek hambo dijalan, samantaro manuruik likunyo, kan baa kolah tantang itu, lai koh didalam adat jo pusako, atau didalam barih jo balabeh, barilah hambo pituahnyo, nak sanang hati ambo mapaliangkan.

Sipangka.

Iyo lah sampai dek datuak,

Kapado datuak juo malah hambo kumbalikan,

Ruponyo nan sapanjang buah kabanaran datuak itu, lah kato hemat gulimat, kato cadiak caratiak matiak, baitu elok nyo urang tau, tau dirantiang kan mancucuak, ingek di duri kan mangaik, takana di dahan kan manimpo,

Tapi samantang pun baitu, usahlah hati diparusuah, usah pikiran dipamabuak, liku jo lekok usah disabuik, tanjuang jo jerok usah dihetong, lah marasai hambo tantang itu,

Baa jikok dihambo itu kini, asa lai datuak duduak baiyo, dan lagi kato bamolah, bajalan lai di nan pasa, sampai  ka lawuik jo  ka  darek, di lahia upek tak ado, di batin Tuhan Nan Tahu, lamo sa saat ambo nanti, dek lamo manuruik adat, alah kok sanang hati datuak.

Sialek.

Iyo dek hambo muluik marah nan sapatah itu bana nan hambo nanti, jikok sabalun dikato itu, manaruah rusuah didalam hati, manaruah ragu kiro-kiro,

Baru mandanga kato itu, ragu hilang rusuah lah jauah, hati sanang pikiran tatap, tarang candonyo pamandangan, tabukak pangana ka nan baiak,    InsyaAllah nak hambo cubo mamaliangkan, untuang taserak jalo suto, kok indak ikan nan kan dapek, untuang lai udang kok tabao, nan barek kok lai ka ringan, senteang kok lai dapek bilai, lai kok jadi nan baitu, nanti dek marah baritonyo

B.            Mampalegakan  kato

          (samo isi jamu)

Sialek I (Datuak)

Kini manolah bagindo,

Kapado bagindo dipohonkan salam,

Titah jo sambah dari muluik, karangan hati nan amat suci, ampun jo maaf hambo pintak, lai rundiangan hambo sabuik, nan bana hambo katangahkan,

Nan kan jadi buah kabanaran dek hambo kapado bagindo, karano lah manitah silang nan bapangka, atau karajo nan bapokok, kapado kito isi jamu, lahia nyo kapado diri hambo, batinnyo kapado kito nan basamo,

Gayuang nan balun hambo sambuik, kato nan balun hambo jawek, tingga tasimpan pado hambo, sabab balaku damikian,   karano  duduak  lai  barumpuak, dan lagi tagak bapusu, jikok suarang kito bagi, jakok sakutu kito balah, baitu mangko samo elok,

Baa kini ;

Nan elok malayang pado hambo, nan rancak tibo ka bagindo, satantangan gayuang ka manyambuik, atau pun kato ka manjawab, dibulekkan aia ka pambuluah, dibulekkan kato ka mufakat, nak dari bagindo tarabiknyo, sakian kabanaran hambo pulangkan ka bagindo, kato nak mintak dibunisi.

Sialek II (Bagindo)

Iyolah sampai dek datuak

Kapado datuak juo malah,

Nan sapanjang buah kabanaran datuak itu, nan talayang kapado hambo, karano lah manitah silang nan bapangka, karajo nan bapokok, kapado kito isi jamu, sungguah pun titah ditutuakannyo, umpamo gayuang dengan sambuik, ibarat kato dengan jawab,

Baa kini ; satantangan gayuang ka manyambuik, ataupun kato kan manjawab, dibulekkan aia ka pambuluah, dibulekkan kato ka mufakat, nak dari ambo tarabiknyo, kan iyo baitu kato datuak ..

Kapado datuak juo malah,;

Ruponyo nan sapanjang buah kabanaran datuak itu, hambo pikia palito hati, hambo nanang saribu aka, kalau ditungkuik tilantangkan, iyolah kato sabananyo, satantangan gayung ka manyambuik, ataupun dikato nan kan manjawab, jikok di hambo tarabiknyo, itu nan pintak pintu hati, siang manjadi angan-angan, malam manjadi buah mimpi, sakali kahandak hati datuak, baribu kali kahandak hati hambo,

Inginlah hambo nan bak datuak, pandai batutua dalam alek, bijak barundiang di nan rami, rundiang tapek kato barisi,

Tapi samantang pun baitu; elok  dituruik pituah tuo, namun disabuik niniak moyang, aia taganang kito sawuak, suri tabantang ditanuni,

Baa kini ; karano di datuak aia nan dalam, nak pueh bana bakacimpuang, nak rancak pulo ba sisalam, satantangan gayuang kan manyambuik, ataupun kato kan manjawab, dinan batakuak kito tabang, dibarih juo kito paek, mamulangkan hambo pado datuak, mandanga kami baritonyo, lai gayuang sambuik, kato jawek sajolah dek datuak, sakian salam hambo pulangkan pado datuak.

Sialek I (Datuak)

Iyolah sampai dek bagindo ;

Kapado bagindo juo malah, ruponyo nan sapanjang buah kabanaran bagindo itu, di anik-anik jo pikiran, di nanang-nanang dalam hati, adat kokoh syarak badiri, adat mukayat janyo urang, pakaian kito di nagari,

Tapi samantang pun baitu, ditinting dadak di niru, dihindang ditampeh tareh, dipiliah atah ciek-ciek, kasamonyo iyo balako,

Baa kini ; tantangan gayung kan manyambuik, ataupun kato kan manjawab, tatumpah juo pado hambo, indak kok kito duduak barumpuak, dan lagi tagak  bapusu,  awak badakek  jo  nan  pandai, baraso barek baban di hambo, lai kok patuik nan baitu, nak dibari hambo pituahnyo, sakian salam hambo pulangkan ka bagindo.

Sialek II (Bagindo)

Iyolah sampai dek datuak,

Ruponyo nan sapanjang buah kabanaran datuak itu, alah didalam cupak nan bapakai, lilisan gantang nan bapareh, kato basusun nan bak siriah, rundiang baatok nan bak pinang, sakato urang maelokkan, surang pun tidak manyalahkan, alah tasabuik iyo balako, lah ragu hambo manjaweknyo,

Tapi samantang pun baitu, nan batiru batuladan, nan batakuak nan batabang, nan babarih nan bapahek, alah suri dahulunyo, jauah lah buliah ditunjuakkan, hampia lah buliah dikakokkan, nan barek jaan dihetong, nan ringan usah disabuik, namonyo kito isi jamu, kok barek ansua bagulembek, kok ringan baok balari, nak kami tolong di balakang, lai kok jadi nan baitu, alah kok sanang hati datuak, sakian salam hambo pulangkan pado datuak.

Sialek I (Datuak)

Iyolah indak lai, manokalo lah baitu bana kato bagindo, habih bicaro dalam hati, hilang aka bana tak dapek, bicaro di badan surang, bamanuang duduak manakua, manangih jo aia mato, rusuah kasia dikatokan, kabajalan badan surang, balayia manuju pulau, karang nan banyak dilautan, lauik sati rantau batuah, urang dunia banyak kiramaik, kok turun topan jo badai, batiup angin silambubu, basabuang ombak jo riak, namuah ka sasek palayaran, kok karam kapa tangah lawuik, tabanam sia lah kan manyalami, tarapuang sia kan mambinjek, awak di dalam lawuik basa, kawan tak ado kiri kanan, antah bak mano kan jadinyo, pikia dek bagndo tantang itu, sakian pulo dari hambo.

Sialek II (Bagindo)

Iyolah sampai dek datuak,

Kapado datuak hambo kumbalikan, ruponyo nan sapanjang buah kabanaran datuak itu, ditiliak lahia jo batin, dipikia palito hati, dinanang saribu aka, itulah kato sabananyo,

Tapi samantang pun baitu, dek pamandangan kami itu kini,  pihak  ka -pado palangkahan, hari baik kutiko elok, bulan nan tarang aco-aco, bak santono urang balayia, angin tanang sikoci laju, kapa mangiriang di balakang, batiup tali bubutan, mandanguang buni biola, baganti tali balati, kapa tadorong ka muaro, tidak sangsaro bahayonyo, bao lalu sajo lah dek datuak, nak bapamandangan kami dibalakang, sakian salam hambo pulangkan pado datuak, alah kok jadi nan baitu,

Sialek I (Datuak)

Iyolah indak lai, manokalo lah baitu bana kato bagindo, kan baa pulo janyo hambo, nak hambo hilangkan molah takuik jo ganta, nak hambo kayai bagulambek,

Tapi samantang pun baitu, namonyo kito lai bakarik, duduak salereang samo alek, nan bak pituah urang tuo, nan saganggam nan samiang, nan sabijo jangan lupo,

Mulo kato kan hambo sabuik, tolong jo doa dibalakang, itu harapan sungguh-sungguh, kapado kito nan basamo, sakian salam hambo puhunkan kapado bagindo.

Sialek II (Bagindo)

Iyolah sampai dek datuak,

Ruponyo nan sapanjang buah kabanaran datuak itu, adat kokoh sarak badiri, syarak nan lazim janyo urang, adat nan kawi kito pakai, dek adat basandi sarak, pakiah nan banyak kawan duduak, alim pun ado dalam jamu, kok indak satanggak doa, satu bismillah kami tolong, lai gayuang sambuiklah, kato jawek sajolah dek datuak, sakian panitahan dipulangkan pado datuak.

Sialek I (Datuak)

Iyolah dek hambo muluik bagindo nan sapatah itu bana nan hambo tunggu, baa nan sangko hati hambo itu cako, pintak kok indak kan babari, kandak kok indak kan balaku, hambo mintak kaliman Allah, kalimah tauhid bagindo bari,

Baa kini ; hambo mintak kalimah tauhid, lah kalimah Allah bagindo bari, nak ulam pucuak manjumbai, nak aia sumua tarabik, maniak dicinto galang buliah, lah sanang bana hati hambo, manyambuik gayuang manjawek kato, manampak tolongan di balakang,

Insya Allah nak hambo suruikkan gayuang ka balabeh, nak hambo kumbalikan kato kamulonyo, simak dek bagindo jaleh-jaleh.

C.    Mangumbalikan kato (ka  sipangka)

Sialek

Kini manolah marah

Kapado marah hambo kumbalikan salam,

Tantangan dari titah dengan sambah, kito sadangkan dinan dahulu tadi,

Maaf dimintak sungguah-sungguah, rundiang disabuik jaleh-jaleh, nan bana hambo katangahkan,

Karano hambo lah kanai ujo lapeh dek marah cako, marenjong kato mufakat, mambao kato baiyo, nan sangko budi bicaro hambo itu cako, aka dicari lakeh dapek, bijo ditanam lakeh tumbuah,

Nan sakarang kini nangko, nan pasa jalan nan hilang, nan samak rimbo tatampuah, nan mujua kato nan tingga, nan malang katibo di hambo,

Dipikia jo hati jo ma'rifat, usahkan ameh nan tabao, bicaro indak batukuak, aratinyo bana kato itu, tantangan gayuang kan manyambuik, ataupun kato kan manjawab, tatumpah juo pado hambo,

Baa jikok dihambo itu kini, nan marusuah nan manggamang, bak umpamo urang mamajek, kok tak talaleh lalu ka pucuak, kok tatingkek lalu ka dahan, kok indak sabanyak gayuang nan tasambuik, atau  pun  indak   sabanyak   kato  nan tajawek, kan baa kolah tantang itu, nak dibari hambo sipatannyo, sakian salam pado marah.

Sipangka

Iyolah sampai dek datuak,

Kapado datuak juo malah

Ruponyo nan sapanjang buah kabanaran datuak itu,  lah lamak bak raso santan, kok manihnyo bak tangguli, lamak manih kucimpuang santan, ko-nyo kan agak tigo hari, baraso ditalingo kami juo,

Tapi samantang pun baitu, sanangkan hati tatapkan iman, nak salamaik jalan dinan tarang, diam didalam martabat, sanang didalam sayarat rukun,

Jikok dihambo itu kini, asa alai gayung datuak sambuik, namonyo kato datuak jawab, asa lai batingkah bunyi gandang, lai batalun bunyi talempong, kok ampek bana dari hambo, ciek sajo dari datuak, namonyo kito badunsanak, baraso elok juo diipandang urang, lai gayuang sambuik, kato jawab sajolah dek datuak.

Sialek

Iyolah dek hambo, muluik marah  nan sapatah itu bana nan hambo nanti, baa nan sangko hati hambo itu cako, kalau baetong ciek-ciek,   babilang satu-satu,

sabab dek marah itu cako, bak santano urang mangaji, dimulai daripado alif, tamat Quraan   tigo puluh, dikaji matan jo maana, dikaji nahu dengan saraf, sampai ka mantiak dengan badiak, bayan maani lah tapakai,

Jikok dek hambo itu kini, indak taturuik di balakang, karano dek kurang pandapatan, kok mangupek marah tantang itu,

Baa kini lah habih cupak dek palilisan, lah habih kato dengan maaf, Insya Allah gayuang hambo sambuik, kok kato nak hambo jawab,

Tapi kapado marah juo malah,

Diawal kato nan mulo tadi, atau dek rundiang nan sabuah, sifat etongan nan sakali, dari panuturan marah cako, alah taserak dinan banyak, alah ta unggun dinan tinggi, alah tabatiak tabarito, taserak  di  alam  lapang,  tatabue dibumi laweh,  sampai  ka  lawuik  nan sadidiah, lalu ka ombak nan badabua, tidaklah umpang jo sampirnyo, alah badangaran kami nan hadir, alah suko kami manarimo, sarato urang tuo-tuo, baitu pun nan hadir dalam jamu,

Tapi kapado marah juo malah

Nan jadi buah kabanaran dek marah kapado hambo itu cako, pihak carano nan katangah, lai barisi kalangkapan, siriah sacabiak nak dikunyah, pinang sadidih nak digatok, gambia sabuah nak dikupia, sadah  di  capu nak dipalik, geleng rokok pamenan tangan, kunyah siriah pamenan bibia, kan baitu bana kato marah,

Tapi kapado marah juo malah,

Ruponyo nan sapanjang buah kabanaran itu, kalau di anik-anik bana, kalau dihusai panabangan, kok dihurak sitambo lamo, tidak tabantah dalam adat, larang lah urang mamban diangnyo,

Pihak carano nan katangah, dipandang bantuak jo buatan, buatan rajo sarimananti, itulah rajo tanah malayu, kalau dihetong kabantuaknyo, bagai bantuak bangau ka hinggok, lantiaknyo bak alang kan manari, rimbunnyo bak bungo kaliki, kambangnyo bagai bungo kincuang, jirunyo bagai bulan ka hilang, bingka bak bulan ampek baleh,

Kalau dihetong pado siriahnyo, banamo udang tampuak hari, tampuaknyo manguku balam, bungonyo tinjau-tinjauan, buahnyo larang basuo, antah kok urang wali Allah,  nan kiramaik hiduik-hiduik, nan batuah sampai mati, batang di tarik ka tinaman, pucuak malambai awan hijau, daunnyo intan jo baiduri, satahun dalam panggulungan, usah kan layua batambah hiduik, tampuaknyo batambah kokoh,

Kalau dihetong pado pinangnyo,  banamo    mayang    taurai,   bak  dasun dibalah duo, nan  sabalah  jatuah ka lawuik, makan  sidi jo bagindo, makanan marah dengan sutan,

Sabalah jatuah kadarek, jatuah ka luhak tanah datar, jatuah katanah limo puluah, jatuah ka agam balai gurah, jatuah ka canduang koto laweh, jatuah ka kubuang tigo baleh, jatuah ka solok ka salayo, sampai ka alam sungai pagu, makanan pangulu jo andiko,

Randahnyo jangkau-jangkauan, tingginyo panjek-panjek an, satahun tupai mamanjek, tigo bulan salodang jatuah, baa nyo kito maambiaknyo, mako dicari lah ungko jo siamang, mamintak maaf kaureknyo, mangko diambiaklah pinang nan tinggi, diambiak sado kan paguno, untuk di alek kito nangko,

Kalau dihetong pado gambia nyo, banamo sicinto damai, dikampo nak urang sarilamak, buatan anak indojati, kuniangnyo bak awan sanjo, ka campuran siriah jo pinang,

Kalau dihetong pado sadahnyo, banamo si ambun suri, putiahnyo jirak jiru jintan, putiah mambayang masuak rimbo, satahun dipunta aceh, samusim dipunta bugih, bakipeh jo ambai-ambai, baturab jo aia bungo, dibasah jo pati santan, sapalik sapulau ameh, sakadam sakati limo, harago tidak taharagoi, antah kok satimbang jo nagari,

Kalau  dihetong   timbakaunyo,  banamo  si  cinto dunia,  bijo  nan  datang  dari ruhum, manampuah lawuik nan sadidih, di ateh ombak nan badabua, daunnyo dicapuak rajo, nan maracik si cinto ameh, nan mahampai si cinto urai, raciknyo haluih bagai lumuik, dilatakkan di biliak dalam, bapantang masiak dek paneh, masiak dek setanggi aia bungo,

Dibaliak nan dari pado itu, pihak carano nan katangah, cukuik barisi kalangkapan, siriah sacabiak lah dikunyah, pinang sadidih lah digatok, sadah dicapu lah dipalik, rokok sabatang lah digiliang, lamak manih tibo dimuluik, kaleknyo lalu ka rakuangan, sarinyo naiak ka firaman, suko nikmat salamonyo, alah kok sanang hati marah, sakian kato hambo kumbalikan pado marah.

Sipangka.

Iyolah manokalo lah baitu bana kato datuak, lah sanang bana hati kami manarimonyo, kok bak santono amin jo doa, lah kami uruikkan sajo pado muko.

Bagian XVI

PIDATO ADAT

 PASAMBAHAN SIRIAH

Dari : www.rangtalu.net

DARI SI ALEK :

Manolah Datuak ……. janyo ambo. 

Sakali ambo maimbau,

sapatah rundiang nan lalu,

walaupun Datuak surang nan di imbau,

batin dek adaik kasamonyo.

Pangana batin ka nan rapek,

ujuiek sambah ka nan banyak.

Sambah sujuik sambah tasimpuah,

sa arek bungka nan piawai,

naraco luruih main daun,

indak basibak jo basisieh,

bukan bahinggo jo babateh.

Sambah tajelo di nan rapek,

rundiang ta tabua ka nan banyak.

Niniak mamak jo panghulu,

nan taduduak ateh majilieh,

niniak mamak jo ibu bapo,

cadiak pandai jo candikeo,

nan mudo arieh Budiman,

kaum ibu samo di dalam,

dalam panggilan ambo juo,

salam di Datuak ditimpokan.

Ujuik nyo sambah nan ta unjuak,

nyato tawalak diukuran,

tabayang barieh jo balabeh,

bana bak andai kato bida

Dek curiang barieh dahulu,

dek andai pusako lamo,

kok basiang di nan tumbuah,

jikok manimbang di nan lai,

tumbuah sarupo iko kini.

Manuruik papatah cupak jo gantang,

dek banyak ragu kok tibo,

dek lamo lupo kok datang,

manusia basifat khilaf.

Agak kok ragu juaronyo,

nan tinggi kok kurang anjuang,

nan gadang kok kurang amba,

sabab dek sasak dengan sampik

aluran di ateh kok di bawah,

patuik di tangah kok di tapi,

kok indak sanang sejahtera,

kok kurang aman jo santoso,

maaf dimintak banyak-banyak,

izin jo rela dari Datuak. 

Limbak nan dari pado itu,

adaik dek duo salanggano,

cancang dek duo salandasan,

puntiang talatak dihulu,

dibawah kiliran taji,

asa rundiang kato dahulu,

tigo limbago nan tajadi.

Partamo sambah-manyambah,

kaduo baso jo basi,

katigo siriah dengan pinang.

Sambah manyambah dalam adaik,

tali-batali undang-undang.

Tasabuik bamuluik manih,

tapakai baso jo basi,

sarato ereang jo gendeang,

muluik manih pangarang baso,

budi baiak tali pikatan,

pahubuang silaturrahim

banamo adat sopan santun.

Rajo alam Minangkabau,

Pamuncak di Limo Puluah,

iyo carano rang namokan.

Ramo-ramo tabang malayang,

malayang ka koto tangah,

banyaknyo ampek puluah ampek.

Indah carano bukan kapalang,

talatak di tangah-tangah,

dilingkuang urang nan banyak,

itu carano pulang pai,

dari sipokok ka panggilan,

dari pangka lalu ka ujuang,

talayok ka ruang tangah,

talayang ka ruang tapi,

sampai dibujua dilintangi,

nyato taunjuak bakeh Datuak,

tibo di muko nan basamo. 

Carano banamo carano basa,

datang nan dari tanah banja,

buatan tukang sungai pua,

tukang banamo Reno Ali,

carano bak tiuang katabang,

elok carano bak alang ka inggok,

ba ukia ba pucuak rabuang,

batatah bamego-mego,

ba aleh kasap bakain rumin.

Panuah barisi kalangkapan,

kaganti baso jo basi

Apolah jinieh kalangkapan,

siriahnyo udang tampak hari,

siriah tambalang kuku balam,

gagangnyo bapantang putuih,

buahnyo intan dengan podi,

babungo lado basaluak batang,

buah diambiak katinaman,

daun diambiak kasusuak mandi,

usah karatak ritie tido,

usah kalayua makin hiduik.

Lorong kapado pinangnyo,

pinang baruntuak nan baruntun,

bak dasun dibalah duo,

bak bawang dibalah ampek,

batangnyo nan lingguraian,

satahun tupai mamanjek,

balun lay sampai kapucuaknyo,

tingginyo jambo-jamboan,

buahnyo jangkau-jangkauan,

jatuah kabawah jadi ambun,

banamo si ambun suri.

Lorong kapado sadahnyo,

sadahnyo langkitang gadang,

dibasuah jo aia ambun,

babasuah jo pati santan,

diambuih jo lingka cino,

dikipeh jo ambi-ambi putiah,

nan bagai banak balam,

dipalik jo jari manih,

bakisa ka jari tangah,

mambayang katapak tangan,

usah kausak makin panuah.

Lorong kapado gambienyo,

kaba barito kami danga,

buatan Puti Sarilamak,

sapipia jatuah kasiriah,

mambayang sampai kamuko,

lamaknyo tingga dirangkungan,

sarinyo naiak kaparumin,

sirahnyo tampak dibibie,

pariso maruang tubuah,

sehat anggota katujuahnyo.

Lorong kapado nan santonyo,

haluih saiknyo dek maraciek,

banamo timbakau jao,

raciek tukang dari piobang,

saheto panjang jaluahnyo,

harun satahun pajalanan…… 

Nak sampai niaik mukasuiknyo,

ujuik mufahum naknyo sah.

Siriah sacabiek nak bakunyah,

pinang sadidieh nak bagatok,

sirahnyo nak dibibia juo.

Itunyo jinieh sambah kami,

sambah alah salam lah tibo,

kato sungguah bana dibari,

harapan kami nan basamo,

sakian sambah pado Datuak,

buni diharap nak kambali.

[sumber:Pidato Aluah Pasambahan Adat-Idrus Hakimi Dt Penghulu-LKAAM Sumbar]

kuokbevel.blogspot.com

JAWABAN PANGKA :

Sutan … [si anu] …jenyo kami, lah sampai kato Sutan.

Sapanjang rundiangan Sutan,

nan talimpah kapado kami,

kok rundiang dijawek pikie,

kato dielo jo mupokaik,

adaik limbago iko kini,

duduak baduo jo batigo,

kato surang dibulati,

kato basamo dipaiyokan,

lomak siriah lego carano,

lomak kato dilega bunyi,

samantaro kami balega,

mancari kato nan sabuah,

sarato bona nan saukuah,

mananti malah Sutan sakutiko.

JAWABAN SI ALEK

Sampai dek angku Datuak/Pangulu.

Sapanjang rundiangan nan katongah, suko lah raso dalam hati, tonang dalam kiro2, kok gayuang lai basambuik,

kok kato lai ka bajawab,

sapokaik kami mananti,

sakitu nyoh kajawek angku Datuak/Pangulu.

(kemudian barisan datuak/pangulu dan niniak mamak lainnya bermufakat singkat, mampa iyo jo mampa tidokan sekedarnya, barulah sambah/kato dikembalikan)

JAWAB OLEH DATUAK/PANGULU PANGKA

Oo Sutan… Sombah babaliak pado Sutan .

Sombah nan talimpah pado kami,

kok gayuang mintak disambuik,

kato mintak dijawek.

manuruik Adaik jo Pusako,

lah di paiyo di patidokan,

lah dipakai ukua jo jangko,

jo niniak mamak panghulu nan hadie ko. Dek duduak baduo jo batigo,

duduak basamo jo nan tuo,

pangulu ompek jo limo,

talalai sombah kambalinyo,

mo’oh di pinto kapado Sutan.

Lah dipandang jo mungkin patuik,

jo alua naraco Adaik,

ditiliek barih balobeh,

kok luruih lah makan tiliek,

bontuak dimakan siku2,

lah di aie lopeh tubo,

lah diukua makan korek,

lokek ubek lah dinan sakik,

lah dinan tumbuah kito basiang,

lah ateh nan lai kito manimbang.

Hanyo ba’a nyo lai kini,

tontang carano nan katongah,

nan tahadok kamuko kami,

ponuah barisi kalongkapan,

barisi siriah dengan pinang,

saroto sodah dengan gambie,

cukuik timbakau diatehnyo.

Nan manuruik pinto Sutan,

siriah sacabiak mintak dikunyah,

 pinang sadidiah mintak digotok,

kok sodah nak dipaliek,

kok gambie nak dipipie,

dipaliek jo jari manieh,

dibeleang kajari malang,

mancayo katapak tangan,

sirah’e nampak dibibie,

raso’e maruang tubuah,

tando samo basuko hati.

Kan montun bona kato Sutan ..?

Kok hanyo tontang disinan,

lah jadi tangguangan ateh kami.

Nan bak kato bida Adaik,

kok lai bak kato papatah,

lahie jo batin saukuran,

isi kuliek umpamo lahie,

gonggam orek pegangan toguah,

tibolah lukieh dilimbago,

habih siriah manjadi sopah,

koleknyo tingga dirongkungan,

pariso maruang tubuah,

sehaik anggota katujuahnyo.

Siriah sacabiek lah kami kunyak,

kok pinang lah kami gotok,

kok sodah lah bapaliek,

kok gambie lah bapipie,

lah kasonang hati Sutan.

JAWAB SiALEK

Ujuik kato buah rundiangan,

nan talimpah kapado kami,

bunyilah samo kito donga,  

rupolah sami kito liek,

lah joniah bona bak dibasuah,

lah toreh bak ditompi,

lah nyato lokang dari kulik,

lah nyato ruruik dari tampuak.

Nan bak kato gurindam dalam Adaik,

nak ulam pucuak manjulai,

nak aie pincuran tobik,

kok nak cincin golang lah buliah,

nak cayo kileklah datang,

nak haluih licin lah tibo,

salosai rundiang di nan elok,

kajadi sasi bungo jo daun,

Adaik bajalan sandirinyo,

sonanglah hati niniak mamak,

suko hati ibu jo bapo,

godang hati kasadonyo.

Kok data lah balantai papan,

licin lah nyato balantai kuliek,

sunyi didalam kiro2x,

sakitu nyo jawek ka angku Datuak/Pangulu.

(YRT-MakUncu)

[Sumber:Pidato Aluah Pasambahan Adat-Idrus Hakimi Dt Penghulu-LKAAM Sumbar]